Канадскиот премиер Џастин Трудо денеска апелираше до граѓаните на земјата да ја „изберат Канада“ кога ќе одлучат да купат производ, по воведувањето царини од 25 отсто од САД за Канада.
„Тоа може да значи проверка на етикетите во супермаркетот и избор на производи произведени во Канада. Тоа би можело да значи да се одлучите за канадско виски наместо бурбон од Кентаки или целосно да се откажете од сокот од портокал од Флорида“, рече Трудо, според CTV News.
Тој, исто така, ги повика канадските граѓани да ги преиспитаат своите планови за одмор доколку претходно ги вклучиле и САД.
„Тоа може да значи промена на плановите за летен одмор, престој овде во Канада и истражување на многуте национални и провинциски паркови, историски места и туристички дестинации што може да ги понуди нашата голема земја“, рече Трудо, обраќајќи им се на Канаѓаните.
Трудо претходно денеска изјави дека земјата ќе воведе царини од 25 отсто на американските стоки во вредност од 155 милијарди канадски долари (102,7 милијарди евра) што ги увезува, како одговор на тарифите од 25 отсто наметнати од САД за стоки од Канада.
Трудо на прес-конференција рече дека дел од царините за стоки од САД, во вредност од 30 милијарди канадски долари, ќе стапат на сила во вторник, а царините за сите други стоки увезени од таа земја ќе стапат на сила за 21 ден.
Американскиот претседател Доналд Трамп во саботата потпиша извршна наредба за воведување царини од 25 отсто за сите стоки од Канада и Мексико почнувајќи од вторник, освен за енергетските производи од Канада, кои беа предмет на царина од десет отсто.
Канада најави дека, како одговор на зголемувањето на царините од САД, ќе го наметне истото зголемување на храната, пијалоците, мебелот и парфемите кои доаѓаат од САД.