Повеќе од 70 луѓе загинаа во Судан, а околу 14.500 куќи се уништени во сезонските дождови и поплавите во таа земја, соопшти денеска висок судански функционер, пренесува АП.
Бројот на загинати од почетокот на сезоната на дождови во мај е 77 лица, изјави за американската агенција Абдул-Џалил Абдул-Рахим, портпарол на Суданскиот национален совет за цивилна одбрана.
Најпогодени се провинциите Северен Кордофан, Џазира, Јужен Кордофан, Јужен Дарфур и реката Нил, додаде суданскиот претставник.
Канцеларијата на ОН за координација на хуманитарни прашања во понеделникот соопшти дека повеќе од 136.000 луѓе се погодени од поплавите во источен Судан.
Агенцијата на ОН рече дека очекува оваа бројка да се зголеми бидејќи сè уште се собираат податоците, а се предвидуваат и нови врнежи.
Сезоната на дождови во Судан обично трае до септември, а поплавите го достигнаа врвот непосредно пред тоа, според АП.