Бројот на загинатите поради уривањето на браната Каховка во Украина и последователните поплави во делот на Херсонската област под руска контрола се искачи на 41, изјави денеска претседателот на проруската регионална влада Андреј Алексејенко.
„За жал, бројот на загинати се искачи на 41“, напиша Алексејенко на својот канал Телеграм, пренесува ТАСС.
Тој изјави дека Нова Каховка постепено се опоравува од катастрофата и дека денеска повторно е вратено снабдувањето со електрична енергија по гранатирањето на украинските сили.
„Водостоите практично се нормализираа во населбата Алешковски, каде што беа поплавени само пониските области. Сепак, високите водостои сè уште остануваат во населените области на округот Голаја Пристан, вклучително и самиот град и блиските населби“, рече Алексејенко.
Според неговите зборови, тимовите за одговор на руското Министерство за вонредни состојби и комунални услуги во моментов се фокусирани на испумпување на водата од канализациските и водоводните објекти.
Продолжува антиепидемиолошката работа во погодената област, собрани се повеќе од 1.600 трупови на мртви животни, а вакцинирани се околу 6.100 домашни животни, јави ТАСС.
„Како што водата се повлекува, ние продолжуваме да ги деконтаминираме улиците и зградите користејќи специјални хемиски средства“, додаде Алексејенко.
Руските и украинските власти меѓусебно се обвинуваат за гранатирање на браната на 6 јуни, што доведе до поплави кои оставија илјадници луѓе без своите домови и стотици илјади без нормален пристап до вода за пиење.
Сите информации поврзани со најновите случувања со војната во Украина можете да ги прочитате ТУКА.