Украинскиот претседател Володимир Зеленски денес објави дека две лица се убиени, а 34 се повредени во рускиот балистички ракетен напад врз Киев.
Тој напиша на социјалната мрежа X дека синоќа 21 ракета била испалена кон украинскиот главен град и дека во тие напади се оштетени станбени згради, енергетски објекти, инфраструктурата на една од железничките станици и метрото, трговски центри и бизниси.
„Дури и еден манастир е меѓу оштетените локации. Нашите служби за итни случаи работат на сите погодени локации. Дванаесет од нашите региони беа под руски напад во текот на ноќта. Пет деца се меѓу повредените“, рече Зеленски.
Тој оцени дека не е добро што Русија ја напаѓа Украина за време на мировните преговори и ги повика сојузниците да им помогнат на Украинците.
„Потребни се посилна воздушна одбрана и брза испорака на ракети, способност за уништување на лансери за балистички ракети и санкции поради војна. Благодарен сум на сите што ја гледаат ситуацијата таква каква што е и ја препознаваат реалноста. Агресорот заслужува да биде третиран како таков“, додаде Зеленски.
Претходно, градоначалникот на Киев, Виталиј Кличко, објави дека 15 лица се повредени во руското гранатирање на Киев во текот на ноќта, вклучувајќи двајца 15-годишни тинејџери, а оштетени се станбени згради, бензинска пумпа, медицинска установа и дел од метро инфраструктурата.
Кличко на Телеграм изјави дека осум повредени лица се хоспитализирани во градските болници, објави Укринформ.
Приватни станбени згради и бензинска пумпа се оштетени во областа Дњепарк, додека пожар избувна во зграда на ресторан во областа Свјатошина.
Во областа Печера е оштетена зградата на станицата за брза помош, како и шест амбулантни возила.
Нема повредени медицински работници.
Дел од метро инфраструктурата на Јужниот мост е исто така оштетен, поради што сообраќајот преку мостот од десната кон левата страна е ограничен.
Територијата на објектот за транспортна инфраструктура во округот Дарница, исто така, беше оштетена.