Германскиот канцелар Олаф Шолц денеска ја повика Кина да не ѝ испраќа оружје на Русија за војната во Украина и побара од Пекинг да изврши притисок врз Москва да ги повлече своите сили.
Во обраќањето пред германскиот парламент, Шолц рече дека е разочарувачки што Пекинг се воздржува од осуда на рускиот напад врз Украина, но ги поздравува повиците на Кина за нуклеарна деескалација, пренесува Ројтерс.
Мојата порака до Пекинг е јасна: искористете го вашето влијание со Москва за да го поттикнете повлекувањето на руските трупи. И не испорачувајте никакво оружје на агресорот Русија, нагласи Шолц.
Минатата недела Кина објави документ од 12 точки во кој се повикува на сеопфатен прекин на огнот во Украина, што на Запад беше дочекано со скептицизам.
Во документот насловен како Позицијата на Кина за политичкото решение на украинската криза, објавен на интернет, кинеското Министерство за надворешни работи соопшти дека Кина ќе продолжи да игра конструктивна улога во продолжувањето на мировните преговори.
Поздравувајќи го ставот на Пекинг за нуклеарната деескалација како дел од наведениот план, германската канцеларка рече дека со право може да се очекува Кина да разговара за нејзините идеи со клучните засегнати страни, вклучувајќи ги Украина и претседателот Володимир Зеленски.
САД разговараат со блиските сојузници за можноста за воведување нови санкции кон Кина доколку Пекинг и обезбеди воена поддршка на Русија за војната во Украина, изјавија извори за Ројтерс оваа недела.
Консултациите, кои сѐ уште се во прелиминарна фаза, имаат за цел да ја соберат поддршката од неколку земји, особено оние од Групата седум најбогати земји (Г7), со цел да се координира поддршката за сите можни санкции.
Сите информации поврзани со најновите случувања со војната во Украина можете да ги прочитате ТУКА.