Русија ќе се соочи со последици доколку употреби „валкана бомба“ или нуклеарно оружје, изјави во понеделникот портпаролот на американскиот Стејт департмент Нед Прајс, додека генералниот секретар на НАТО ги отфрли руските тврдења дека Украина има намера да употреби „валкана бомба“.
На прашањето дали Вашингтон ќе ја третира употребата на „валкана бомба“ на ист начин како и употребата на нуклеарна бомба, Прајс рече дека „ќе има последици“ за Русија во секој случај.
„Без разлика дали користи „валкана бомба“ или нуклеарна бомба. Бевме јасни по тоа прашање“, рече Прајс.
Генералниот секретар на НАТО Јенс Столтенберг изјави дека сојузниците на НАТО го отфрлаат обвинувањето дека Украина се подготвува да употреби „валкана бомба“ на нејзина територија за да ја обвини Русија за настанатата радиоактивна контаминација.
„Сојузниците на НАТО ги отфрлаат руските обвинувања. Русија не смее да го користи ова како изговор за ескалација“, рече Столтенберг.
Западните сојузници на Украина отфрлија каква било сугестија дека Киев гради или планира да користи „валкана бомба“, конвенционално оружје чие јадро е обвиткано во нуклеарен материјал.
Украинскиот претседател Володимир Зеленски рече дека обвинението е знак дека самата Москва планира таков напад и дека ќе го обвини Киев.
Рускиот министер за надворешни работи Сергеј Лавров во понеделникот рече дека обвинувањата на Зеленски дека Москва планира напад со радиоактивна „валкана бомба“ не се за „сериозна дискусија“.
Сите информации поврзани со најновите случувања со војната во Украина можете да ги прочитате ТУКА.