Администрацијата на претседателот Доналд Трамп подготви санкции против целиот Меѓународен кривичен суд (МКС) и планира наскоро да ги објави, изјавија два извори запознаени со ситуацијата.
Тоа е потег што би го засилил нападот врз тој глобален суд што ги гони воените злосторства и геноцидот низ целиот свет.
Администрацијата на Трамп не го крие своето незадоволство од судот и се стреми да го ослабне.
Американските претставници сакаат судот да ги повлече налозите за апсење на израелските лидери, како и да ја отфрли претходната истрага за американските војници во Авганистан.
Во јули, американскиот државен секретар Марко Рубио најави кампања за изолирање на судот, повикувајќи ги другите земји да се повлечат од институцијата.
Вашингтон веќе воведе санкции против голем број судии и обвинители на МКС, но досега се воздржа од воведување санкции врз самиот суд, иако оваа можност се разгледуваше долго време.
Стејт департментот не одговори веднаш на барањето за коментар.
Санкциите против судот се подготвени, велат изворите, иако точниот момент на нивното објавување останува непознат.
„Волстрит џурнал“ цитираше официјални лица кои велат дека одлуката би можела да биде финализирана уште оваа недела, за време на сесијата на Генералното собрание на Обединетите нации.
Директното таргетирање на целата организација, како и на субјектите што соработуваат со неа, би можело сериозно да ја загрози работата на судот.
Санкциите што Министерството за финансии на САД би ги вовело против целата институција би им забраниле на граѓаните и бизнисите на САД да обезбедуваат средства, стоки или услуги на судот без посебна дозвола од Канцеларијата за контрола на странски средства (OFAC) на Министерството.
Банките често ги спроведуваат ваквите санкции на САД построго отколку што е потребно, бидејќи зависат од пристапот до американскиот финансиски систем.
Спротивставувањето на Трамп на тој суд датира од неговиот прв мандат.
Меѓународниот кривичен суд (МКС) е основан во 2002 година од меѓународната заедница за гонење на воени злосторства, геноцид и злосторства против човештвото.
Судот презема надлежност само ако една земја-членка не е во можност или не сака да ги гони злосторствата извршени самостојно.
Соединетите Американски Држави никогаш не биле членка на тој суд, објавува Ројтерс.