Американски функционер му рече на Меѓународниот суд на правдата (МСП) дека постои „сериозна загриженост“ за непристрасноста на агенцијата на ОН за палестинските бегалци (УНРВА).
Судиите на МСП оваа недела одржуваат сослушувања за да формулираат советодавно мислење за обврските на Израел кон агенциите на ОН кои им доставуваат помош на Палестинците во Газа.
„Постојат сериозни загрижености во врска со непристрасноста на UNRWA, вклучително и информациите дека Хамас ги користел објектите на UNRWA и дека вработените во агенцијата учествувале во терористичкиот напад врз Израел на 7 октомври“, изјави Џош Симонс од правниот тим на американскиот Стејт департмент, пренесува агенцијата Франс Прес (AFP).
Симонс им рече на судиите дека Израел има „доволно основа“ да ја доведе во прашање непристрасноста на UNRWA.
„Со оглед на овие загрижености, јасно е дека Израел нема обврска да дозволи UNRWA да обезбеди хуманитарна помош“, додаде тој.
„UNRWA не е единствената опција за доставување хуманитарна помош во Газа“, нагласи тој.
Израел претходно оваа година забрани секаква соработка со активностите на UNRWA во Газа и окупираниот Западен Брег, тврдејќи дека агенцијата била инфилтрирана од Хамас – обвинение кое беше жестоко оспорено.
UNRWA претходно го обвини Израел за злоупотреба на десетици свои вработени во воен притвор и за користење на некои од нив како човечки штитови.
Шефот на агенцијата, Филип Лазарини, изјави дека повеќе од 50 членови на персоналот – вклучувајќи наставници, лекари и социјални работници – биле притворени и злоупотребени од почетокот на 18-месечната војна во Газа.