Воениот суд во Москва го осуди Енди Стоун, портпаролот на американската технолошка компанија Мета платформс, на шест години затвор за „јавно заговарање тероризам“, пренесе агенцијата РИА.
Мета како компанија исто така е означена како екстремистичка организација во Русија, а платформите под нејзина капа, Фејсбук и Инстаграм, беа забранети во земјата во 2022 година, кога Русија ја нападна Украина.
Ниту Мета ниту портпаролот Енди Стоун сè уште не одговориле на барањето за коментар.
Руската новинска агенција Интерфакс ја цитираше адвокатката на Стоун, Валентина Филипенкова, која рече дека ќе поднесе жалба на казната и дека „побара ослободителна пресуда“.
Руското Министерство за внатрешни работи отвори кривична истрага против Стоун кон крајот на минатата година, без да открие конкретни обвиненија.
РИА ги цитира зборовите на државните истражители кои тврдат дека Стоун објавил коментари на интернет во кои бранел „агресивни, непријателски и насилни акции“ против руските војници вклучени во т.н. „специјална воена операција“ во Украина.