Во Франција утре со неизвесен резултат ќе се одржи првиот круг од парламентарните избори, кој конечно ќе биде познат дури по вториот круг една недела подоцна, бидејќи не се знае дали центристичкиот претседател Емануел Макрон ќе освои мнозинство од 577 пратеници.
Според последната анкета на јавното мислење пренесена од BMFTV и весникот Express, коалицијата на Макрон Заедно може да освои 27 отсто од гласовите, а сојузот на левичарските партии предводен од лидерот на радикалната левица Жан-Лук Меланшон 26,5 отсто.
На трето место би била екстремно десничарската партија Национален собир на лидерот Марин Ле Пен (Марин) со 19,5 отсто, а на четврто би биле десничарските републиканци со 11 отсто.
Медиумите оценија дека недела ќе биде „вистински натпревар меѓу Макрон и Меланшон“
70-годишниот Меланшон, кој го освои третото место во првиот круг на претседателските избори, сака парламентарните избори да ги претстави како трет круг од претседателските избори.
Неговата коалиција наречена „Нова народна еколошка и социјална унија“ (Nupes) ги обединува социјалистите, комунистите, еколозите и партијата на Меланшон, Неосвоена Франција.
Французите ќе гласаат за кандидатите за 577 пратеници, а за апсолутно мнозинство е потребно да се освојат најмалку 289 пратенички места.
Ако сојузот на Макрон го загуби мнозинството, тоа ќе биде преседан од воведувањето на Петтата република во Франција во 1958 година, потсетуваат локалните медиуми.
Пред почетокот на изборниот молк, кој започна во петокот на полноќ, Макрон ги повика гласачите да изберат „јасно и силно мнозинство“ кое ги осудува екстремните политички струи кои сакаат да одат „од криза во криза“.
„Ништо не би било поопасно од додавање француски неред на светскиот неред, кој предлага екстремни струи“, рече Макрон, алудирајќи на радикалната левица и екстремната десница.
Францускиот претседател неодамна изјави дека ако неговата коалиција победи, по вториот круг од изборите на 19 јуни, ќе ги собере политичките, економските и социјалните сили, но и граѓаните избрани со ждрепка, за да започнат реформи за подобрување на куповната моќ, животната средина, пензиите и институциите.
Денеска започнува гласањето во неколку француски прекуморски територии како Гвадалупе и Мартиник.