Русија има намера да ги пренесе своите обвинувања дека Украина планира напад со „валкана бомба“ до Советот за безбедност на Обединетите нации и го повика шефот на ОН Антонио Гутереш да направи се што може за „да го спречи ова грозоморно злосторство“.
Со напредокот на украинските сили во стратешки важната провинција Херсон, окупирана од Русија, највисоките руски функционери им телефонираа на своите западни колеги во неделата и понеделникот и рекоа дека Москва се сомнева дека Украина планира да користи таканаречена „валкана бомба“ која содржи нуклеарен материјал.
Украинскиот претседател Володимир Зеленски одговори обвинувајќи ја Русија дека сама планира таков напад и дека за тоа ќе ја обвини Украина.
Западните земји, исто така, ги отфрлија обвинувањата на Русија како изговор за интензивирање на осуммесечната војна што започна во февруари кога руските сили ја нападнаа соседна Украина.
Протечено писмо
„Ќе ја сметаме употребата на „валкана бомба“ од режимот во Киев како акт на нуклеарен тероризам“, напиша рускиот амбасадор во ОН Василиј Небензија во писмото до Гутереш и Советот за безбедност што Ројтерс го видел во понеделникот.
„Ги повикуваме западните земји да влијаат врз режимот во Киев да се откаже од своите опасни планови кои го загрозуваат меѓународниот мир и безбедност“, напиша тој.
„Го повикуваме генералниот секретар на Обединетите нации да направи се што е во негова моќ за да спречи да се случи ова грозоморно злосторство“.
Русија им најави на другите членови на Советот дека ќе го покрене ова прашање на состанок зад затворени врати во вторник, рекоа дипломатите.
Советот има одржано десетици состаноци за Украина, но не може да преземе никакви значајни мерки бидејќи Русија има право на вето, заедно со САД, Кина, Велика Британија и Франција.
Русија е дипломатски изолирана во ОН. Претходно овој месец, три четвртини од Генералното собрание од 193 членки и 143 нации гласаа за осуда на рускиот „обид за нелегална анексија“ на четири делумно окупирани региони во Украина и ги повикаа сите земји да не го признаат потегот.
Сите информации поврзани со најновите случувања со војната во Украина можете да ги прочитате ТУКА.