Како одговор на убиството на Дарија Дугина, ќерката на идеологот на рускиот ултранационализам, рускиот претседател Владимир Путин би можел да ја радикализира и прошири војната во Украина, но и да ја засили репресијата во земјата со чистки во безбедносните служби, пишуваат светските медиуми.
Бомбашкиот напад во кој загина Дугина, како и неодамнешните експлозии на Крим и на југот на Русија, ја зголемија загриженоста за влошувањето на безбедносната ситуација во земјата, но сега и кај руската елита која ја величеше војната во Украина, јавува Радио Слободна Европа.
По обвинувањата на руските власти дека Украина стои зад убиството на ултранационалистичкиот коментатор, побарана е одмазда од провоениот табор во Русија, истакнува Њујорк тајмс, со оценка дека овие повици го истакнуваат внатрешно политичкиот притисок што претседателот Владимир Путин се соочува со шест месеци откако нареди инвазија на Украина.
Избезумените барања за одмазда што следеа откако руските безбедносни служби соопштија дека брзо го решиле убиството, укажуваат на зголеменото влијание на руските ултранационалистички јастреби, лабава група писатели, бизнисмени и политичари кои ја величат војната на Путин, но исто така се фрустрирани што Кремљ се обидува да го задржи чувството на нормалност во Русија, наместо да објави дека земјата е во војна.
Гласовите блиски до Кремљ го насочија својот гнев, покрај Украина, и кон Естонија по наводите на Федералната служба за безбедност (ФСБ) дека земјата крие убиец, што навестува можност за ескалација на поширокиот конфликт меѓу Русија и Западот, оценува Њујорк Тајмс и укажува дека руските тврдења, особено за злосторствата, провокациите и неуспесите на бојното поле, постојано се покажале како невистинити.
Од друга страна, Украинците се подготвуваат за опасна недела
Денот на независноста на земјата, 24 август, се смета за симболичен датум на кој Путин би можел да ги удвои своите напади.
Во првите јавни коментари по смртта на неговата ќерка, Александар Дугин ја прогласи за маченик и ја повика Русија да ја продолжи борбата.
Обидот да се убие националистичкиот гуру на Путин е увертира за нова опасна фаза од војната во Украина, додека самите Руси треба да се подготват за чистка, коментира уредничкиот весник „Тајмс“, повикувајќи се на шпекулации дека цел на нападот бил Александар Дугин, а не како што соопшти ФСБ, неговата ќерка.
Прашањето сега е како Путин ќе реагира, дали со напад на Киев оваа недела додека Украина го слави Денот на независноста или со користење на експлозијата како изговор за чистење на руските безбедносни служби, пишува лондонскиот весник, додавајќи дека втората опција е поверојатна.
Делови од руските безбедносни служби се поделени околу бавното темпо на војната и неодлучниот пристап кон ставање крај на анексијата на Доњецк, пишува Тајмс, додавајќи дека самиот Путин бавниот напредок во Украина го гледа како последица на неуспехот на руските разузнавачки служби.
Имено нивната неспособност да го запрат протокот на западно оружје или обуката на украинските специјални сили.
Постои одредена можност некоја украинска единица да поставила експлозив во автомобилот на Дугин, но тешко е да се види што би добил Киев со елиминирање на Александар Дугин или неговата ќерка.
Од друга страна, истакнува Тајмс, во самата Русија се води повеќекратна борба за власт, а обидот за атентат речиси сигурно дојде од околината.
Нападот врз Дугин, како идеолог на инвазијата, може да се толкува како начин за радикализирање на воените напори.
Кој и да стоел зад нападот, очигледно сакал уште поагресивен, одмаздољубив врховен командант, подготвен да ја ескалира војната во Украина и да заземе построг став за вмешаноста на Западот.
Но, посочува Тајмс, тие би можеле да добијат поинаков одговор, лидер решен да најде жртвени јарци и да го реновира безбедносниот апарат што ќе го задржи на власт.
Убиството со автомобил-бомба предизвика вознемиреност кај поддржувачите на војната на Путин во Украина, пишува „Вашингтон пост“ и оценува дека нападот исто така ја зголемил веројатноста за сериозна ескалација на војната бидејќи Путин е под зголемен притисок да удри силно врз Украина.
Смртта на Дугина ги потресе руските ТВ водители, новинари и други коментатори, кои користат пропаганда за да ја оправдаат инвазијата на Украина како војна против западната глобална моќ и „нацистите“ во Украина, наведува весникот, додавајќи дека атентатот го зголеми чувството на ранливост меѓу елитата и највидливите застапници на војната кои сфатија дека тие можат да бидат мети и дека владата можеби нема да може да ги заштити.
Бомбашкиот напад на 20 август уследи по експлозиите во јужна Русија и окупираниот Крим, како и мистериозните пожари во згради и магацини низ целата земја.
Одеднаш, војната што им се чинеше многу далечна за многу обични Руси дојде крајно блиску, поткопувајќи го имплицитниот договор на Кремљ со главно пасивното руско население дека само Путин може да ги одржува безбедноста, мирот и економската стабилност.
Додека пред непријателите и критичарите на Путин стравуваа дека ќе бидат застрелани или отруени, сега најистакнатите сојузници на рускиот лидер во јавноста се чувствуваат несигурни и се потпираат на приватни телохранители и други заштитни мерки против невидени и непредвидливи закани.
Британскиот Би-Би-Си (ББЦ) укажува дека во Русија постои загриженост дека убиството на Дугина може да биде изговор за зајакнување на репресијата во Русија или за понатамошни напади врз Украина.
И во Русија, според британскиот јавен сервис, многумина ќе бидат загрижени поради влошувањето на безбедносната ситуација во земјата, особено по серијата експлозии во последните недели во база во окупираниот Крим и руските региони во близина на границата со Украина.
Некои анкети покажуваат дека се повеќе Руси се загрижени дека „специјалната воена операција“, како што Кремљ ја нарекува инвазијата на Украина, се одолговлекува и пропаѓа.
Сите информации поврзани со најновите случувања со војната во Украина можете да ги прочитате ТУКА.