Папата Франциско денеска во Индонезија ги повика муслиманите и католиците да ги охрабрат светските лидери да се соочат со опасностите од климатските промени и екстремизмот и укажа на заедничките корени на различните религиозни верувања, пренесува Ројтерс на вториот ден од досега најголемата меѓународна турнеја на папата.
Поглаварот на Католичката црква, за време на посетата на најголемата џамија во Југоисточна Азија, во Џакарта со големиот имам и другите локални верски водачи, објави заедничка декларација во која повикува на „одлучна акција“ за решавање на проблемот со глобалното затоплување, пренесува Ројтерс.
„Експлоатацијата на нашиот заеднички дом предизвика климатски промени, што доведе до различни деструктивни последици како природни катастрофи, глобално затоплување и непредвидливи временски услови“, се вели во декларацијата потпишана од папата Франциско и големиот имам на Индонезија Насарудин Умар.
„Искрено ги повикуваме сите луѓе со добра волја да преземат решителна акција за да се зачува интегритетот на природата и нејзините ресурси“, е една од пораките во декларацијата.
Папата до петок е во посета на Индонезија, од каде ја продолжува својата 12-дневна турнеја низ земјите од регионот на Југоисточна Азија и Океанија.
Папата Франциско го истакна католичко-муслиманскиот дијалог за време на неговото 11-годишно папство и потпиша неколку заеднички декларации со муслиманските лидери, пренесува Ројтерс.
Попладнево папата Франциско ќе одржи миса на стадионот Гелора Бунг Карно во Џакарта, а во знак на почит, индонезискиот министер за верски прашања предложи локалните радиодифузери да го прекинат дневното попладневно емитување на муслиманскиот повик за молитва и наместо тоа да го емитуваат текстот.
Утре Папата заминува од Индонезија за Папуа Нова Гвинеја, потоа Источен Тимор и Сингапур.