Наводниот водач на јапонскиот криминален синдикат Јакуза се изјасни за виновен за шверц на нуклеарни материјали од Мјанмар како дел од глобална мрежа за наркотици, оружје и перење пари, соопшти американското Министерство за правда.
За време на тајна истрага на американската Администрација за борба против дрога (ДЕА) во 2021 година, Такеши Ебисава се обидел да продаде материјали – вклучително и ураниум и плутониум за оружје – на некого за кој верувал дека е ирански генерал кој ги барал за програма за нуклеарно оружје, се вели во соопштението.
60-годишен јапонски државјанин во средата пред судот во Њујорк се изјасни за виновен за заговор со мрежа на соработници за транспорт на нуклеарни материјали од Мјанмар, соопштено е.
Тој, исто така, ги призна обвиненијата за меѓународна трговија со дрога и оружје.
Во 2021 година, Ебисава му рекол на таен агент на ДЕА дека неименуван водач на бунтовничка група во Мјанмар, земјата порано позната како Бурма, може да продаде нуклеарен материјал преку Ебисава на фиктивен ирански генерал за да финансира голема набавка на оружје, се наведува во обвинението.
Една година подоцна, американските власти го уапсија Ебисава под обвинение дека планирал да дистрибуира дрога во САД и да купи проектили земја-воздух од американско производство.
На почетокот на минатата година тој беше обвинет и за наводна продажба во Иран.
„Како што призна денеска пред судот, Такеши Ебисава дрско шверцувал нуклеарен материјал, вклучително и плутониум за оружје, од Бурма“, рече вршителот на должноста јавен обвинител за јужниот округ на Њујорк, Едвард И. Ким.
„Истовремено, тој работеше на испраќање огромни количества хероин и метамфетамин во SAD во замена за тешко оружје, како што се ракетите земја-воздух, што ќе се користат во Бурма и за перење, како што тој веруваше, пари за дрога од Њујорк до Токио“, се наведува меѓу другото.
Си-Ен-Ен ги контактираше адвокатите на Ебисав за коментар за случајот.
Мјанмар, порано познат како Бурма, е вовлечен во граѓанска војна од февруари 2021 година, кога војската на оваа земја од Југоисточна Азија ја собори демократски избраната влада.
Земјата е преплавена со природни ресурси како што се ретки земјени метали и други материјали клучни за цивилната и воената технологија, вклучувајќи го и ураниумот.
Останува главен производител на наркотици и долго време е магнет за транснационалниот криминал.
За време на неговите односи со тајниот агент на ДЕА, Ебисава испратиl слики „на кои се прикажани карпести материи со гајгерови бројачи кои го мерат зрачењето“, според обвинението, како и страници од, како што рече Ебисава, лабораториски анализи „што укажуваат на присуство на радиоактивни елементи ториум и ураниум“.
Министерството за правда соопшти дека Ебисава „ненамерно вовел таен агент на ДЕА кој се претставувал како дилер на дрога и оружје во меѓународната мрежа на криминални соработници на Ебисава, која се проширила, меѓу другите места, во Јапонија, Тајланд, Бурма, Шри Ланка и САД“, заради договарање на големи трансакции со дрога и оружје“.
Меѓународната трговија со нуклеарни материјали носи максимална казна од 20 години затвор, според одделот, кој го наведе Ебисава како водач на Јакуза, озлогласена мрежа на јапонски криминални семејства.
„Овој случај ја покажува неспоредливата способност на ДЕА да ги попречи најголемите криминални мрежи во светот“, рече администраторката на ДЕА, Ен Милграм.
„Денешната молба треба да послужи како силен потсетник за оние кои ја загрозуваат нашата национална безбедност со шверц на плутониум од типот на оружје и други опасни материјали во име на синдикатите за организиран криминал дека Министерството за правда ќе ве повика на одговорност до највисок степен на законот“ – изјави помошникот јавен обвинител Метју Г. Олсен од Одделението за национална безбедност на Министерството за правда.