Ирачките поморски сили запленија неидентификуван брод во територијалните води во Персискиот залив, за кој постои сомневање дека се користел за шверц на гориво, соопшти морнарицата.
Шверцот со гориво е честа појава во водите на Заливот, каде субвенционираното гориво од одредени земји незаконски се препродава низ целиот регион, но заплените на бродови се релативно ретки, објави Ројтерс.
Поморска патрола го пресретнала бродот вчера откако добила разузнавачки информации за сомнителна активност, се вели во соопштението.
Бродот превезувал ирански капетан, осум индиски државјани и двајца ирачки членови на екипажот.
Морнарицата објави фотографија од бродот, но неговото име не беше видливо.
Дополнителни детали за бродот не беа објавени.
Бродот е пренесен во поморската база Ум Каср за понатамошна истрага, додека членовите на екипажот се предадени на локалната полиција.