Иницијативата на американскиот претседател Доналд Трамп, кој се договори со рускиот претседател Владимир Путин „веднаш“ да започнат преговори за Украина, не е „предавство“ на таа земја, изјави денеска во Брисел американскиот секретар за одбрана Пит Хегсет.
„Нема предавство. Постои разбирање дека целиот свет и САД се посветени на мирот, на мирот со преговори“, изјави Хегсет на новинарите пред состанокот на министрите за одбрана на НАТО, пренесува агенцијата Франс прес.
Тој рече дека обидот на САД да преговараат меѓу Украина и Русија „сигурно не е предавство“ на украинските војници кои се борат против руската инвазија во последните три години, пренесува Би-Би-Си.
Хегсет истакна дека САД покажале неверојатна посветеност на НАТО и дека ниту една земја не направила поголема посветеност на Украина од САД.
Тој додаде дека САД инвестирале повеќе од 300 милијарди долари за да ги стабилизираат линиите на фронтот по почетокот на руската агресија и дека светот е „среќен“ што го има претседателот Доналд Трамп и дека сега само тој „може да ги собере силите за да донесе мир“.
Трамп најави средба со рускиот претседател Путин и предвиде прекин на огнот во Украина „во не толку далечна иднина“.
Американскиот претседател го информираше украинскиот претседател Володимир Зеленски за неговиот разговор со Путин.
Путин му рекол на Трамп дека сака да најде „долгорочно решение“ за украинскиот конфликт преку „мировни преговори“, соопшти Кремљ.
Би-Би-Си потсетува дека Хегсет вчера изјавил дека би било нереално да се мисли дека Украина би можела да се врати на своите државни граници пред 2014 година и ги минимизираше изгледите на Киев за влез во НАТО.