Уставниот суд на Чешка во вторник го отфрли случајот на маж кој од религиозни причини побарал изземање од правилото за забрана на насмевка на фотографии од пасош и лична карта.
Барањето на мажот за право да има насмеано лице на личната карта судот во Прага го отфрли.
Според прописите, фотографиите на личните документи мора да имаат неутрален израз на лицето, а неговите не ги исполнувале тие стандардни барања.
Тој побара изземање од условот врз основа на неговата религиозна припадност со Ecclesiai Risorum, или Црква на насмевките.
Главната порака на Црквата е да шири насмевки меѓу луѓето, рече тој.
Судиите одлучија дека неговото право на слобода на вероисповед не е ограничено и укажаа на барањата на ЕУ за неутрални изрази на лицето на фотографиите за лична карта за да се обезбеди сигурна идентификација.
Тие исто така изразија сомнеж за „сериозноста“ на верските убедувања на тужителот.
Чешкото Министерство за култура пред пет години го одби барањето на црквата на насмевките да го признае статусот на религиозна група.