Циклонот Арнаб денес го забави своето движење по источниот брег на Индија, а повеќе од 180.000 луѓе беа евакуирани од државите Андра Прадеш и Одиша.
Метеоролошката служба на Индија го класифицираше Арнаб како многу силна циклонска бура, третата највисока категорија на нејзината скала, објави Ројтерс.
Циклонот почна да се приближува кон копното порано од очекуваното, но неговиот центар остана над Бенгалскиот Залив, додека надворешниот дел од бурата се движеше кон брегот.
Се предвидуваат ветрови од 115 до 125 километри на час, со налети до 140 километри на час и бран од еден до 1,5 метри над нормалното ниво на плима, што би можело да ги поплави ниските области на Андра Прадеш.
Поради бурата, прекинато е снабдувањето со електрична енергија и одредени сообраќајни правци, искорнати се дрвја, а некои училишта се затворени.
Работата на три аеродроми во Андра Прадеш е суспендирана, додека некои полетувања на возови и авиони се откажани.
Непалските власти ги предупредија туристите да не одат во области со голема надморска височина поради можни обилни врнежи од дожд, снежни бури и лавини на Хималаите од четврток вечер до сабота.
Бенгалскиот Залив е една од главните области на формирање на тропски циклони што го погодуваат источниот брег на Индија.
Суперциклонот што ја погоди Одиша во октомври 1999 година уби речиси 10.000 луѓе.