Деветте нуклеарни сили во светот ги зголемија трошоците за своите нуклеарни арсенали за 19 проценти во 2025 година, според извештајот на Меѓународната кампања за укинување на нуклеарното оружје (ICAN).
Минатата година, ICAN ги процени вкупните трошоци на 119 милијарди долари, што е еквивалентно на 3.768 долари во секунда, објави организацијата.
ICAN беше движечката сила зад Договорот на ОН за забрана на нуклеарно оружје (TPNW) и беше наградена со Нобелова награда за мир во 2017 година за својата работа. Договорот стапи на сила во 2021 година.
Според ICAN, Соединетите Американски Држави потрошиле повеќе за нуклеарно оружје во 2025 година отколку другите осум нуклеарни сили заедно.
Потрошувачката на САД изнесуваше 69,2 милијарди долари, по што следува Кина со 13,5 милијарди долари.
Обединетото Кралство ја престигна Русија и го зазеде третото место, потрошувајќи 12,6 милијарди долари, додека Русија потроши 9,5 милијарди долари, се вели во извештајот.
Според ICAN, Русија има најголем нуклеарен арсенал со 5420 боеви глави.
По неа следат САД со 5042, Кина со 620, Франција со 300, Обединетото Кралство со 225, Индија со 190, Пакистан со 170, Израел со 90 и Северна Кореја со 60.
ICAN изјави дека, според нивните пресметки, потрошената сума за еден ден би можела да обезбеди два милиони луѓе повеќе да не мора да се грижат од каде ќе им дојде следниот оброк.
Организацијата соопшти дека парите потрошени само во последните три години би можеле да стават крај на гладот во светот.
Трошењето во 2025 година би можело да го покрие и редовниот буџет на Обединетите нации за 32 години, се вели во извештајот.