Бројот на егзекуции во Северна Кореја нагло се зголемил за време на пандемијата на КОВИД, покажува нов извештај на невладина организација со седиште во Сеул.
Според Работната група за транзициска правда (TJWG), од јануари 2020 година до крајот на 2024 година, најмалку 153 лица биле егзекутирани или осудени на смрт.
Ова е нагло зголемување во споредба со претходниот период, кога биле регистрирани 44 вакви случаи помеѓу 2015 и 2019 година.
Извештајот покажува дека меѓу најчестите прекршоци се оние поврзани со религијата, суеверието и консумирањето странска културна содржина, вклучително и гледање јужнокорејски серии и слушање K-pop.
По период на релативен пад на егзекуциите помеѓу 2015 и 2019 година, поврзан со меѓународен притисок и истрага на Обединетите нации за кршење на човековите права, трендот нагло се сменил во 2020 година.
Во тоа време, според достапните податоци, најмалку 54 лица биле егзекутирани, а уште 45 една година подоцна, во споредба со просекот од околу пет егзекуции годишно во претходните години.
Вкупно, за време на владеењето на Ким Џонг-ун, документирани се 144 случаи на егзекуции и смртни казни, при што најголемиот број се однесува на прекршоци поврзани со идеолошка и културна контрола.
Бројот на егзекуции би можел дополнително да се зголеми
К-драмите и К-поп музиката, кои претставуваат еден од најсилните културни извози на Јужна Кореја, се строго забранети во Северна Кореја.
Истражувачите истакнуваат дека режимот го доживува ширењето на јужнокорејската поп-култура како закана за сопствената идеологија и политичка стабилност, пишува Би-Би-Си.
Колку далеку одат властите во спроведувањето на овие забрани покажува ретко видео од 2024 година, во кое двајца тинејџери беа јавно осудени на 12 години принудна работа поради гледање и споделување јужнокорејски серии.
Меѓу другите злосторства што резултираа со егзекуции се критикување на лидерот или владејачката партија, убиство, трговија со дрога и помагање на граѓаните да избегаат од земјата.
TJWG предупредува дека бројот на егзекуции може дополнително да се зголеми.
„Бидејќи режимот се стреми да ја консолидира власта и потенцијално да продолжи со династичкото наследување, постои висок ризик од зголемување на егзекуциите за да се зајакне идеолошката контрола и да се одржи политичката доминација“, се вели во извештајот.
Според истиот извор, вкупно 358 лица биле егзекутирани помеѓу 2011 и 2024 година.
Повеќе од 70 проценти од тие егзекуции биле извршени јавно, обично со стрелачки вод.
Податоците се базираат на сведочењето на повеќе од 250 севернокорејски дезертери од 51 град и округ, а организацијата идентификувала и 46 локации низ целата земја каде што биле извршени егзекуции за време на владеењето на Ким.
Работната група за транзициска правда е основана во 2014 година во Сеул, а е составена од истражувачи и активисти од неколку земји.
Организацијата редовно ги следи и документира кршењата на човековите права во Северна Кореја, со посебен акцент на примената на смртната казна.