Поранешната ТВ водителка, политичарка и инфлуенсерка Ксенија Собчак (43), која го предизвика рускиот претседател Владимир Путин на претседателските избори во 2018 година, аплицираше за дозвола за престој во Шпанија за дигитални номади за себе и за својот осумгодишен син.
Според шпанските медиуми „Ел Паис“ и „Ел Конфиденшал“, оваа членка на руската елита сака да живее во Шпанија повеќе од половина година, да плаќа даноци таму и да работи од далечина за странски работодавци.
Собчак, која поседува француска петгодишна шенген виза, израелски и руски пасош, веќе може слободно да патува во Европа до 90 дена на секои шест месеци.
Сепак, статусот на дигитален номад би ѝ овозможил да остане долгорочно и да избега од Русија, како што пишуваат медиумите.
Русија се соочува со длабока криза поради западните санкции, инфлацијата расте, а режимот на Путин го заострува својот притисок врз критичарите.
Нејзиниот медиум, „Осторожно новости“, често објавува критики кон владата, но секогаш во граници што не ја преминуваат црвената линија.
Во 2023 година, Собчак присуствувала на наводна скандалозна „гола забава“ во московскиот клуб Мутабор, што го разбесни Кремљ.
Додека другите учесници беа казнети или уапсени, таа избегна санкции и издаде јавно извинување.
Многумина во опозицијата го протолкуваа тоа како доказ дека сè уште е „заштитена“.
Нејзината врска со Путин датира одамна.
Имено, тој присуствувал на нејзиното православно крштевање како дете, а нејзиниот татко, Анатолиј Собчак, поранешен градоначалник на Санкт Петербург, бил негов политички ментор.
Затоа Собчак често се нарекува „кума на Путин“. Ксенија претходно беше популарна водителка на ријалити-шоу и позираше за Плејбој.
Кога го предизвика Путин во 2018 година, многумина веруваа дека изборите се наместени во корист на Путин.
И покрај тоа што го критикуваше рускиот лидер, таа наводно одржала лична средба со него пред да објави дека ќе му се спротивстави, пишува „Мирор“.
Нејзината мајка, Људмила Нарусова (74), е руска сенаторка и една од ретките во Думата која повремено гласа против законите на Путин.
Пред две години, таа предупреди за „неразумноста“ на војната во Украина и изјави за Новаја Газета Европа:
„Јас сум единствената што гласа против него. Но, има доволно луѓе кои мислат исто како мене. Тие само се плашат да го кажат тоа гласно.“
Шпанија стана популарна дестинација за богатите Руси кои бегаат од санкциите.
Програмата за дигитални номади, воведена во 2023 година, бара минимален месечен приход од околу 2.760 евра и доказ за работа за странска компанија.
Собчак, која заработува пари преку медиуми, YouTube и кампањи на инфлуенсери, лесно ги исполнува условите.
Се шпекулира дека таа веќе купила луксузна куќа на Коста дел Сол, но нема потврда за ова.