Под притисок од рекордните цени на дизелот и помалку од два месеци до изборите за Конгрес, Доналд Трамп се врати на својот вообичаен став во хаотичните и досега залудни напори за ставање крај на војната во Украина: тој почна да ја обвинува жртвата.
Моментот во кој тој го прави тоа не може да биде полош за Киев, ниту покорисен за Москва, според анализата на CNN.
„Г-дин Зеленски мора да направи едно нешто: мора да престане да ги уништува руските резерви на дизел“, им рече американскиот претседател на новинарите во неделата, осврнувајќи се на украинскиот претседател Володимир Зеленски. „Тоа му штети на целиот свет“.
Ставот на Трамп е во најдобар случај недоследен.
Ова доаѓа помалку од една година откако извори потврдија за CNN дека САД го засилиле споделувањето разузнавачки информации со Украина токму за да може да ги таргетира руските енергетски капацитети – во време кога цените на нафтата беа ниски.
Дополнително, ова доаѓа едвај една недела откако Трамп тврдеше дека цените на горивата ќе паднат штом ќе заврши војната со Иран, без дури ни да ја спомене војната во Украина.
BREAKING: Trump to Zelensky:
Zelensky has to do one thing. He has to stop knocking out diesel fuel in Russia.
He is causing a shortage of diesel.
This isn’t done by the Middle East. This is done by what’s happening between Russia and Ukraine. pic.twitter.com/hF9TlBbRlq
— Clash Report (@clashreport) September 13, 2026
Експерти: Проблемот не е само во нападите врз рафинериите
Тврдењето дека проблемот со скапото гориво ќе исчезне во моментот кога Украина ќе престане да ги напаѓа руските рафинерии, според аналитичарите, едноставно не е точно.
Енди Липоу од консултантската фирма од Тексас „Липоу Оил Асошиејтс“ проценува дека одлуката на Русија да го забрани извозот на гориво, донесена како одговор на украинските напади, отстранила 800.000 барели дизел од пазарот дневно.
Од друга страна, затворањето на Ормутскиот теснец одзело дури 1,2 милиони барели дневно.
Во најлош случај, таков чекор претставува уште едно предавство на Киев.
Соочена со критичен недостаток на воздушна одбрана, Украина посегнува по една од ретките преостанати карти што ги има во рацете – напади врз руската воена машина и изворите на енергија што ја напојуваат, и тоа на самата руска територија.
Предавството боли уште повеќе затоа што доаѓа во средината на речиси континуирани руски напади со беспилотни летала и ракети, пред зимата што Москва повторно отворено планира да ја користи како оружје.
Во понеделник, Трамп објави на својата социјална мрежа Truth Social дека и Русија и Украина се согласиле да ги запрат нападите врз енергетските капацитети една на друга, иако всушност воопшто не е постигнат таков договор.
Она што следеше како одговор од Кремљ беше чиста лекција за извртување на вистината и извлекување максимална пропагандна корист.
Кремљ го искористи Трамп за свој ПР
Москва прво играше со едноставна тактика. За да го смири Трамп, портпаролот на Кремљ, Дмитриј Песков, го нарече предлогот „многу добра идеја“, додавајќи: „Во контакт сме со американската страна“.
Потоа понуди веќе видена фикција насочена кон оцрнување на Украина: „Секогаш сме за мирни решенија“.
Потоа следеше многу повнимателен маневар: како да се продолжи со прикажување на Украина како агресор, без истовремено да се распука фасадата дека нападите врз рафинериите всушност не ѝ штетат толку многу на Русија.
„Иако таквото примирје би ни овозможило целосно да го заситиме домашниот пазар… тој е веќе блиску до целосно заситување“, тврди Песков.
„Проблемот не е во производството, туку во обезбедувањето непречен пристап до тие нафтени деривати на светските пазари“.
Ова му послужи да го префрли фокусот од погодените рафинерии на неодамнешниот бран украински напади врз руски танкери за нафта, без, се разбира, ниту еден збор за руските напади врз трговски бродови и украински пристаништа.
На крајот, пристигна главната порака на Песков:
„Вториот неопходен чекор е, се разбира, укинување на санкциите. Само тогаш светот ќе биде соодветно снабден со овие нафтени производи.“
Syzran Oil refinery this morning pic.twitter.com/bYNqYR0JTE
— Exilenova+ (@Exilenova_plus) September 15, 2026
Москва бара укинување на санкциите
Тие веројатно гледаат можност во Кремљ. Порано оваа година, САД привремено укинаа дел од санкциите против Русија кога војната во Иран го загрози глобалното снабдување со нафта.
Но, ова може да биде и руски обид да се избегне спротивниот исход.
Само оваа недела, администрацијата на Трамп воведе санкции врз една од најголемите руски банки поради нејзините врски со Иран, во време кога Претставничкиот дом на САД се приближува кон гласање за пакет сеопфатни санкции против Русија, кој го изготви сенаторот Линдзи Греам пред неговата смрт во јули.
За Зеленски, ова е ладен туш.
Пред нешто повеќе од една недела, претставниците на Трамп за надворешна политика го прегрнаа пред камерите во средината на Киев на неговата долгонајавувана прва посета на Украина, поттикнувајќи надежи за нов моментум во дипломатијата.
Но, предупредувачките знаци беа видливи од самиот почеток.
Прво отидоа во Русија, а потоа Трамп го повика Путин по телефон, додека тој не го повика Зеленски.
Покрај тоа, иако испораката на ракети за системите „Патриот“ е сè уште на маса, Трамп оваа недела истакна дека размислуваат за „помалку напредна верзија“ за Киев.
Дури и ако ги оставиме настрана очигледните лични симпатии на Трамп кон Путин и фактичките празнини во тврдењето дека Украина е виновна за високите цени на дизелот, приказната се враќа на централната дилема што го следи овој конфликт од првиот ден: Како да се казни Русија како клучен светски производител на нафта без да се казни самата себеси? И дали целата решителност исчезнува во моментот кога цените на горивата ќе почнат да растат?