Анкетата на јавното мислење спроведена од агенцијата „Паблик фрст“ покажа дека голем број граѓани на Европската Унија не знаат кој е претседателката на Европската комисија, Урсула фон дер Лајен, додека меѓу оние кои се запознаени со нејзината работа, има релативно малкумина кои ја оценуваат позитивно.
Во анкетата спроведена во Франција, Германија и Шпанија за „Политико“, околу една петтина од испитаниците во Германија и Шпанија оцениле дека Фон дер Лајен добро ја врши работата, додека во Франција само 12 проценти од испитаниците ја оцениле нејзината работа позитивно.
Во исто време, речиси една третина од испитаниците во Франција и Шпанија, како и 45 проценти во Германија, ја оцениле нејзината работа негативно.
Во Германија, овој став беше особено изразен од гласачите кои изјавија дека ќе гласаат за десничарската Алтернатива за Германија (АфД), при што повеќе од половина од нив ја оцениле работата на фон дер Лајен како „многу лоша“.
Во Франција и Шпанија, значително поголем број испитаници не ја оцениле нејзината работа ниту позитивно ниту негативно, но изјавиле дека немаат мислење или дека дури и не слушнале за неа.
Повеќе од една петтина од анкетираните во Франција рекле дека не знаат која е фон дер Лајен, во споредба со 10 проценти во Шпанија и пет проценти во Германија.
Резултатите од анкетата беа објавени неколку часа пред фон дер Лајен да ја претстави својата визија за иднината на ЕУ во своето годишно обраќање за состојбата на Унијата.
Себ Рајд, директор за истражување на јавното мислење во агенцијата „Паблик фрст“, рече дека фон дер Лајен се соочува со истото „антиполитичко расположение“ што доведе до отстранување на некои актуелни политичари низ Европа и дека ќе мора да се потруди да ги убеди граѓаните дека политиките на ЕУ можат да ги решат нивните загрижености, особено околу трошоците за живот.
Анкетата, исто така, покажа дека релативно мал број граѓани планираат да го следат нејзиното обраќање во живо.
Околу 10 проценти од испитаниците во трите земји рекле дека ќе го следат внимателно, додека околу една третина рекле дека ќе го следат во помала мера.
Испитаниците во Германија беа повеќе заинтересирани за говорот, додека во Франција и Шпанија повеќе од половина рекоа дека, иако знаеле за говорот, нема да го следат или дури и не слушнале за него.
Сепак, авторите на истражувањето наведуваат дека дури и овие податоци би можеле да го преценат вистинскиот интерес на граѓаните за говорот, бидејќи испитаниците изјавиле дека ќе следат и измислен настан наречен „Европска конвенција за авторитет“.
Анкетата е спроведена од 13 до 15 септември меѓу повеќе од 2.000 возрасни граѓани во секоја од трите земји.
Резултатите се пондерирани според возраста, полот, регионот и образованието, како и според резултатите од француските избори во 2024 година, за да се совпаднат со демографските карактеристики на населението.
Маргината на грешка е 2,2 процентни поени за Шпанија и Германија и 2,1 процентен поен за Франција, пренесува Танјуг.