Светската здравствена организација (СЗО) објави во недела дека започнала вакцинацијата за борба против новата епидемија на ебола прогласена на почетокот на септември во Демократска Република Конго (ДР Конго).
Вирусот ебола често е фатален и покрај неодамна имплементираните вакцини и третмани.
Таа хеморагична треска убила 15.000 луѓе во Африка во последните 50 години.
Најсмртоносната епидемија на ебола во ДР Конго од 2018 до 2020 година предизвикала речиси 2.300 смртни случаи и 3.500 инфекции.
Според извештајот на здравствените власти на Конго денес, во најновиот бран се регистрирани 28 смртни случаи и 81 случај на инфекција од 20 август, кога е пријавен првиот случај на 34-годишна бремена жена.
Стапката на смртност се проценува на 34,6 проценти, а за време на претходните епидемии достигнала 90 проценти од заразените, според СЗО.
„Првата серија од 400 дози од вакцината против ебола Ервебо од националните залихи од 2.000 дози што беа во главниот град Киншаса е доставена во градот Булапе, еден од моменталните епицентри на епидемијата“, додаде СЗО.
Се очекува дополнителни дози од вакцината да бидат доставени во погодените подрачја во наредните денови, додаде СЗО.
Првите вакцини беа наменети за здравствените работници на првата линија и за луѓето кои биле во контакт со пациентите.
Заирскиот сој на вирусот е причина за новата епидемија.
Нема вакцина за сите шест соеви, од кои три (Бундибухо, Судан, Заир) веќе предизвикаа големи епидемии.
Меѓународната група за координација на вакцини (IGC), која управува со глобалните залихи на вакцини, вклучително и еболата, одобри испорака на 45.000 дополнителни дози во ДР Конго, според СЗО, која го проценува ризикот што го претставува новата епидемија како висок за земјата и умерен за соседните земји.
50 експерти на СЗО, заедно со експерти од Конго, се распоредени во регионот каде што има епидемија.
Еболата за прв пат е идентификувана во 1976 година во Заир, поранешното име на ДР Конго.
Оваа болест се пренесува преку телесни течности, а главните симптоми се треска, повраќање, крварење и дијареја.
Заразените лица стануваат заразни дури по појавата на симптомите, по период на инкубација што трае од два до 21 ден.