Кина планира да ги елиминира тешките форми на загадување на воздухот до крајот на 2025 година, изјави висок претставник за заштита на животната средина.
Целта е дел од зголемените напори на властите да го контролираат загадувањето и да ги намалат емисиите, како дел од „битката за синото небо“, објави Ројтерс.
Ли Тианвеи, директор на Одделот за атмосферска наука и технологија, рече дека Кина ќе ги подобри системите за прогнозирање на загадувањето на воздухот и рано предупредување и ќе го подобри координираното управување со штетните честички во воздухот, како што е PM2.5, како и со загадувањето со озон.
„Битката за синото небо останува непроменета“, рече Ли, според Министерството за екологија и заштита на животната средина.
Ли истакна дека Кина мора да воведе нови стандарди за емисии кои ќе бидат во согласност со глобалните најдобри практики и додаде дека земјата ќе го зголеми уделот на нови енергетски ефикасни возила и машини на аеродромите и пристаништата.
Светската здравствена организација (СЗО) изјави дека иако е постигнат напредок, загадувањето на воздухот останува сериозен проблем во Кина, со негативно влијание врз економијата и квалитетот на животот на луѓето.
Според СЗО, загадениот воздух е одговорен за околу два милиони смртни случаи годишно во Кина.
СЗО смета дека концентрациите на ПМ2,5 над 50 микрограми на метар квадратен се „сериозно загадување“, пренесува Танјуг.