Палестинската влада во Газа соопшти дека израелската армија неодамна ги запалила шаторите на раселените Палестинци во северниот дел на Газа, извршила егзекуции на терен и спроведувала политика на намерно гладување за да ги спроведе плановите за депортација и да го претвори местото во тампон зона.
Исмаил ес-Севабите, директор на канцеларијата за медиуми на владата во Газа, даде изјава за АА во врска со политиката на израелската војска во северниот дел на Појасот Газа.
Севабите рече дека израелската армија веќе неколку дена ги пали шаторите на раселените луѓе во засолништата во северниот дел на Газа.
Тој наведе дека израелската армија врши интензивни копнени и воздушни напади врз бегалскиот камп Џабалија и регионите Беит Лахија и Беит Ханун на северот од Појасот Газа и го опсадува регионот околу 19 дена.
Севабите рече дека израелската армија почнала да ги пали шаторите на раселените Палестинци по евакуацијата на различни сместувачки центри на северот.
„Целта на Израел е раселување, што вклучува претворање на северниот дел на Појасот Газа во тампон зона“, рече тој.
Севабите рече дека израелската армија го прави тоа „под целосна заштита на американската администрација, која и обезбеди оружје за извршување злосторства, и со одобрение на некои западни земји како Велика Британија, Германија и Франција, кои се партнери во геноцид“.
Осудувајќи ги обидите на Израел за раселување на палестинскиот народ, Севабите го повика „слободниот свет да ја осуди оваа политика“.
Сметајќи ги САД, Израел и западните земји кои го поддржуваат одговорни за она што се случува во Газа, Севабите ја повика меѓународната заедница да престане да молчи, да изврши притисок врз Израел да го запре геноцидот и да заземе практични и сериозни позиции за да го запре раселувањето на Палестинците во северниот дел на Газа.
Севабите нагласи дека палестинскиот народ на северот на Газа е подложен на јасна политика на гладување поради израелското блокирање на влезот на стоки и помош, а оваа ситуација ги загрозува нивните животи.