Во просториите на Занаетчискиот дом утре со почеток во 19:30 часот ќе биде промовирана стихозбирката „Ноќни белешки“ од Весна Тодоровска.
Тодоровска е наставник по македонски јазик и литература во ООУ „Кочо Рацин“, а на промоцијата фрагменти од делото ќе читаат токму нејзините некогашни ученици.
Промотори на овој настан ќе бидат Христина Алексовска и Катерина Костадинова.
– Низ стиховите на оваа стихозбирка се разоткрива мистеријата на миењето на душата низ летниот дож, без слобода нема пронаоѓање на сродната душа; оваа се стихови кои ја осознаваат побудата која ги носи бранувањата од далечните мориња на животот, да се воздигне напластеното во душата, да се открие тежината на омразата, но и како се тоа да се победи, вели авторката.
Стихозбирката е во издание на издавачката куќа „Дата-ПЕСНОПОЈ“ Битола и се најде во групата ракописи кои ќе се печатат во едицијата Книжевни меридијани.
Оваа стихозбирка ја освои наградата Душата на чаршијата.
Влезот на настанот е слободен за сите љубители на убавиот пишан збор.
Никола Ивановски