Рускиот претседател Владимир Путин утринава во разговор со министерот за одбрана Сергеј Шојгу, кој беше емитуван на руската телевизија, прогласи победа на руските сили во разурнатиот град Мариупол во јужна Украина.
Но, најновото тврдење на Русија дека Мариупол паднал во руски раце не претставува никаква вистинска промена на теренот, според дописникот на Скај њуз од Москва, Ендрју Рот.
Самиот начин на кој беше испратена пораката за падот на Мариупол во јавноста, за време на средбата меѓу Путин и Шојгу, која беше емитувана на руската прорежимска телевизија, сугерира дека ова е претстава за јавноста.
Имено, на средбата со Путин, Шојгу прочитал хартиен извештај за борбите во Мариупол и изјавил дека градот е „ослободен“, иако реално борбите во Мариупол се уште траат.
„Наредувам да се откаже нападот“
Шојгу рече дека „ќе бидат потребни уште неколку дена“ за руските сили да ги победат украинските борци кои даваат отпор од огромната фабрика за челик Азовстал.
Состанокот, според Рот, изгледал организиран за да се оправдаат руските сили да се откажат од нападот на фабриката за челик од која украинските маринци и Азовскиот полк пружиле жесток отпор.
Путин го нарече планот за напад на челичарницата „непрактичен“ и театрално најави: „Наредувам да се откаже нападот“.
„Ова е случај кога треба да размислуваме, односно секогаш треба да размислуваме, особено во овој случај, за зачувување на животот и здравјето на нашите војници и офицери. Нема потреба тие да влегуваат во тие катакомби и да ползат низ индустриски погони“, му рекол Путин на министерот за одбрана.
На Путин очајно му треба некаква победа
Наместо тоа, тој им нареди на руските сили да ја блокираат индустриската област „за да не помине ни мува“.
Најавата за падот на Мариупол е во согласност со претходните предвидувања на западните претставници и аналитичари, кои веќе подолго време велат дека на Путин брзо му треба некаква победа што би можел да ја прослави на големата воена парада во Москва на 9 мај, Денот на победата.
Имено, руската инвазија на Украина, најблаго речено, не е во согласност со планот за брзо освојување на Киев и соборување на Володимир Зеленски.
Украинците им пружија жесток отпор на руските сили и им нанесоа огромни загуби.