Еден од тројца жители на планетата, односно 2,69 милијарди луѓе, не можат да си дозволат разновидна исхрана што ги задоволува енергетските и нутритивните потреби, според новиот извештај на пет агенции на ОН, и предупредува дека ќе биде потребна огромна работа за да се постигне глобалната цел за нула глад до 2030 година.
Глобалниот глад беше во опаѓање трета година по ред во 2025 година, погодувајќи 7,8 проценти од луѓето, во споредба со 8,1 процент во 2024 година.
Исто така, имаше знак дека долгорочниот тренд на зголемување на гладот во Африка е запрен.
Сепак, процентот на луѓе кои не можат да си дозволат здрава исхрана останува „екстремно висок“, изјави за британскиот дневен весник Гардијан водечкиот економист на Организацијата за храна и земјоделство на ОН (ФАО) Максимо Тореро, еден од авторите на извештајот.
Годишниот извештај за состојбата со безбедноста на храната и исхраната во светот за 2006 година пресмета дека здравата исхрана чини 4,28 долари прилагодени за паритетот на куповната моќ дневно.
„Линијата на екстремна сиромаштија е три долари по лице“, рече Тореро, додавајќи дека здравата исхрана чини значително повеќе.
Тој исто така рече дека владите обично се фокусирани на субвенционирање на житарки и скробна храна, наместо на месо, овошје, зеленчук и млечни производи.
„Тоа значи калории, но не и разновидност на исхраната“, рече Тореро и го истакна влијанието на таквата исхрана врз стапката на дебелина и болести како што се ракот и дијабетесот.
Податоците од Светската здравствена организација (СЗО) покажуваат дека дебелината кај возрасните се зголемила од 12 проценти во 2012 година на 16 проценти во 2024 година.
„Многу е итно. Дебелината (кај возрасните) расте толку брзо што мораме напорно да работиме за да ги минимизираме ризиците и скриените трошоци што ќе ги донесе значителното зголемување на дебелината“, рече Тореро, објави Гардијан.
Тореро повика на инвестиции во инфраструктура, истражување и развој, бидејќи некои модели во извештајот укажуваат дека поефикасните синџири на снабдување би можеле да ја намалат цената на месото и млечните производи, како и овошјето и зеленчукот.
Тој, исто така, предложи нови политики за поттикнување на поголема потрошувачка на овошје и зеленчук за да се намали економското влијание на здравствените проблеми поврзани со лошата исхрана.
Во Африка минатата година, 66,6 проценти од населението не можеше да си дозволи здрава исхрана, што е повеќе од двојно повисоко отколку во Азија или Латинска Америка.
За прв пат, Африка стана континент со најгладни луѓе, околу 309 милиони, надминувајќи ја Азија со 292 милиони, според извештајот на агенциите на ОН.
Тореро вели дека растот во голема мера е поттикнат од поголемиот раст на населението во Африка, при што процентот на гладни всушност почнува да се намалува „за прв пат по многу години“.
Автори на извештајот се ФАО, СЗО, УНИЦЕФ, Светската програма за храна на ОН и Меѓународниот фонд за развој на земјоделството.