Талибанците денеска објавија дека сите козметички салони во Авганистан сега мора да се затворат откако ќе истече еден месец.
Таа одлука предизвика големо противење во јавноста, пренесува АП, додавајќи дека не е прецизирано како ќе бидат санкционирани оние кои нема да ја почитуваат таквата одлука.
Претходното објавување на рокот од еден месец за затворање на салоните доведе до ретки јавни протести во кои десетици козметичари и шминкери се собраа во Кабул, при што безбедносните сили употребија пиштоли за шокирање и тејзери за да ги разбијат демонстрациите.
Талибанците рекоа дека одлучиле да ги забранат козметичките салони затоа што нудат услуги наводно забранети во исламот и затоа што наводно предизвикувале економски тешкотии на семејствата на младоженците за време на свадбените веселби.
Од семејствата на младоженецот традиционално се барало да ги платат посетите на невестата и нивните блиски роднини во салонот пред свадбата.
„Не се работи за средување на косата и ноктите, туку за 60.000 жени кои ќе останат без работа. Станува збор за тоа дека жените ќе изгубат едно од ретките места каде што можеа да одат за заедница и поддршка, откако Талибанците систематски го уништија целиот систем што беше воспоставен за да одговори на семејното насилство“, рече Хедер Бар, помошник директор за правата на жените во Хјуман рајтс воч.
И покрај првичните ветувања за поумерено владеење отколку за време на нивното претходно владеење во 1990-тите, талибанците воведоа остри мерки откако ја презедоа контролата врз Авганистан во август 2021 година, бидејќи силите на САД и НАТО се повлекоа.
АП наведува дека талибанците им забраниле на жените на јавни места како што се парковите и спортските сали и ги загрозиле медиумските слободи и дека мерките предизвикале жестоки меѓународни критики.
Обединетите нации соопштија дека се во преговори со авганистанските власти за укинување на забраната.