Администрацијата на претседателот на Соединетите Американски Држави, Доналд Трамп, соопшти дека по грешка известила некои украински бегалци дека мора веднаш да ја напуштат земјата бидејќи им е одземен правниот статус.
Некои Украинци кои влегоа во САД за време на мандатот на поранешниот претседател Џо Бајден оваа недела добија мејлови во кои се наведува дека Министерството за домашна безбедност (DHS) ќе ја отповика нивната правна заштита, пишува CBS News.
Администрацијата на Бајден дозволи околу 240.000 Украинци да влезат според политиката „Обединување за Украина“ (U4U), која им дозволуваше на американските граѓани да ги спонзорираат Украинците раселени од војната.
Исто така, повеќе од 20.000 Украинци кои полетале во Мексико на почетокот на војната, исто така, се примени во САД со дозволи за привремен престој, кои овозможуваат работни дозволи и заштита од депортација на хуманитарни причини.
Кога CBS News контактираше со претставници на DHS, тие рекоа дека известувањето било испратено по грешка.
„Пораката е по грешка испратена до некои Украинци кои учествуваат во програмата U4U. Програмата U4U не е суспендирана“, се вели во соопштението на DHS.
Во петокот, агенцијата го повлече мејлот и испрати ново известување, кое гласи: „Можеби сте добиле известување со наслов „Известување за престанок на привремен престој“. DHS ја испрати оваа порака по грешка.“
Не е јасно колку Украинци го добиле известувањето.
Иако администрацијата на Трамп формално не ја суспендираше програмата U4U, таа го суспендираше приемот на нови поединци и обновувањето на статусот за оние кои веќе се во САД.
Администрацијата, исто така, стави крај на иницијативата за спонзорирање на Кубанците, државјаните на Хаити, Никарагва и Венецуела, предупредувајќи ги повеќе од 500.000 мигранти кои влегле во САД според политиката дека ќе бидат уапсени и депортирани доколку не ја напуштат земјата до 24 април.