Шведската полиција уапси жена која испрскала антиисламски активист со прашок од противпожарен апарат додека протестирал пред иранската амбасада во Стокхолм со палење на муслиманската света книга Куран.
Таа жена беше однесена и осомничена за нарушување на јавниот ред и мир и насилно однесување кон полицаец, а активистот Салван Момика, бегалец од Ирак, непречено го продолжи протестот бидејќи беше одобрен од полицијата.
Полицијата го дозволи неговиот протест со образложение дека има слобода на говор, но го сомничи за говор на омраза.
Серијата антиисламски протести и палење на Куранот во Шведска го предизвикаа гневот на муслиманските земји, нападите врз шведските дипломатски претставништва и заканите од исламските екстремисти.
Во четвртокот, Шведска ја подигна тревогата за тероризам на речиси највисоко ниво, велејќи дека таа стана приоритетна цел на терористичките групи.
Активистот рече дека ќе продолжи да пали копии од Куранот и покрај заканите и до него и до Шведска, бидејќи тој вели дека „сака да го заштити населението во Шведска од пораките што ги испраќа Куранот“.
Муслиманските лидери во Шведска ја повикаа земјата да најде начин да го запре палењето на Куранот.
Шведска се откажа од законот против богохулење пред половина век, а владата вели дека нема намера повторно да го воведе.
Сепак, владата објави дека ги разгледува законските опции за полицијата да одбие дозвола за демонстрации доколку постои загриженост за националната безбедност на Шведска.
Според министерот за правда Гунар Штромер, ќе се проучуваат законите во земјите како Франција, Норвешка и Холандија, кои според него имаат широка слобода на говорот, но и „поголем простор за вклучување на безбедноста во овој тип на проценка“.
Палењето на Куранот поттикна неколку земји да ги советуваат своите граѓани да бидат внимателни кога патуваат во Шведска.
Американската амбасада во Шведска оваа недела издаде безбедносно предупредување за „можни одмазднички терористички напади“ и ги повика американските граѓани да бидат претпазливи кога одат на преполни јавни места и во близина на дипломатски претставништва.