Шведска ќе го продолжи дијалогот со Турција за да се надминат приговорите што ги покрена Анкара во врска со апликацијата на земјата за членство во НАТО, изјави денеска шведскиот министер за надворешни работи Тобијас Билстром.
„Верувам дека разговорите одат во многу позитивна насока“, изјави Билстром за новинарите во Берлин, по средбата со нејзината германска колешка Аналена Бербок, пренесе Ројтерс.
Билстром рече дека разговорите ќе продолжат на сите нивоа и наскоро ќе одат во Анкара, додека разговорите меѓу властите на Шведска, Турција и Финска, која исто така аплицираше за членство, ќе продолжат паралелно.
Турција го условува влезот на нордиските земји во НАТО со екстрадиција на лица кои нашле засолниште во тие земји, а Анкара ги смета за терористи.
Од 30-те земји членки на НАТО, освен Турција, членството на Шведска и Финска не го ратификуваше ниту Унгарија.
Затоа, германската министерка за надворешни работи Аналена Бербок изјави дека нема „сива зона“ кога станува збор за ратификација на членството на Шведска и Финска во НАТО.
„Кога станува збор за Унгарија, сакам детално да појаснам – нема сива зона“, рече Бербок.
Унгарскиот парламент ќе расправа за ратификацијата на членството на нордиските земји во НАТО оваа есен, откако ќе бидат усвоени низа закони на ЕУ, изјави во средата унгарскиот премиер Виктор Орбан.