Северна Кореја „остро ја осудува“ декларацијата дадена на неодамнешниот самит на НАТО, објави во саботата државната новинска агенција КЦНА, цитирајќи го портпаролот на Министерството за надворешни работи.
Земјите на НАТО го повторија своето ветување за Украина за членство и зазедоа поцврст став за поддршката на Кина за Русија во декларацијата оваа недела во Вашингтон.
„Декларацијата од самитот во Вашингтон, подготвена и објавена на 10 јули, докажува дека САД и НАТО, сведени на алатки за конфронтација, претставуваат најсериозна закана за глобалниот мир и безбедност“, соопшти КЦНА, цитирајќи го портпаролот на Министерството за надворешни работи, пренесува Хина.
Во соопштението на Северна Кореја се додава дека потезите на САД за проширување на воените блокови со земјите од НАТО и азиските партнери, вклучително и Јужна Кореја и Јапонија, „се злобната основна причина за сериозно загрозување на регионалниот мир, екстремно влошување на меѓународната безбедносна средина и предизвикување светска трка во вооружување“.
Во декларацијата од самитот се повикува Кина да стави крај на секаква материјална и политичка поддршка за руските воени напори.
Исто така, ги обвинува Иран и Северна Кореја дека ја поттикнуваат руската војна во Украина со обезбедување директна воена поддршка на Москва.
Одделно, Јужна Кореја и САД на маргините на самитот потпишаа насоки за воспоставување на интегриран проширен систем за одвраќање за Корејскиот полуостров за да се спротивстави на нуклеарните и воените закани од Северна Кореја.