Северна Кореја изгради нов објект за збогатување ураниум во својот главен нуклеарен комплекс Јонгбјон, кој може да смести до 28 каскади центрифуги, и започна со проширување на објектот за збогатување ураниум Кангсон, соопшти денес Меѓународната агенција за атомска енергија (МААЕ).
МААЕ, со седиште во Виена, во извештај наведува дека наодите укажуваат на континуирано проширување на нуклеарната инфраструктура на Северна Кореја на повеќе локации, објавува Ројтерс.
Во извештајот се вели дека МААЕ се потпира на сателитски снимки и материјали со отворен код, вклучително и фотографии објавени од севернокорејските државни медиуми, за да ги следи нуклеарните активности на Пјонгјанг.
Инспекторите од таа агенција не ја посетиле Северна Кореја од 2009 година.
Во извештајот, исто така, се вели дека има индикации дека операциите започнале во јануари во објектот за збогатување ураниум во Кангсон, во близина на главниот град Пјонгјанг, во рамките на анекс кој бил изграден во 2024 година, објави Танјуг.
МААЕ соопшти дека развојот на настаните во нуклеарната програма на Северна Кореја ги прекршил резолуциите на Советот за безбедност на ООН.
„Тековното работење на постројките за збогатување во Кангсонг и Јонгбјон и пријавеното понатамошно проширување на производството на нуклеарен материјал за оружје во Северна Кореја е причина за сериозна загриженост“, рече генералниот директор на МААЕ, Рафаел Гроси.
Мисијата на Северна Кореја во Обединетите нации во Виена минатиот септември објави дека статусот на Северна Кореја како држава со нуклеарно оружје станал неповратлив и дека МААЕ „нема законско право… да се меша во внатрешните работи на држава со нуклеарно оружје што постои надвор од Договорот за неширење на нуклеарно оружје“.