Сите десет тела пронајдени во падот на приватен авион поврзан со водачот на Вагнер Евгениј Пригожин, а во кој наводно бил присутен и самиот Пригожин, биле пренесени на идентификација, објавија руските медиуми во четвртокот, ден по авионската несреќа.
Како што пишува Киев Индепендент, повикувајќи се на рускиот весник Фонтанка, телата се пренесени во мртовечницата на Институтот за судски медицински прегледи во градот Твер.
„Москва тајмс“ објави и дека телефонот на Пригожин бил пронајден на местото на несреќата, иако неговото тело се уште не е идентификувано.
Приватниот авион Embraer Legacy се урна во близина на селото Куженкино во Тверската област додека летал од Москва за Санкт Петербург вечерта на 23 август.
Основачот на групата Вагнер, кој започна краткотраен бунт против Кремљ во јуни оваа година, се верува дека загинал во несреќа.
Според Институтот за проучување на војната, Путин „речиси сигурно ѝ наредил на руската воена команда да го собори авионот на Пригожин“.
Сепак, смртта на воениот лидер се уште не е потврдена од официјални извори.
Додека причината за падот засега е непозната, податоците за следење на летот покажуваат дека во последните минути од летот, авионот правел непредвидливи искачувања и спуштања, пред драматично да се спушти речиси 2.500 метри во минута, по што престанал да пренесува податоци за висината.
Рускиот истражен комитет покрена „кривична постапка“ по падот на леталото поради наводно прекршување на правилата за безбедност во сообраќајот и воздушниот сообраќај.
Се чини дека видео снимката од несреќата покажува дека авионот е регистриран на Пригожин, бидејќи регистарскиот број на авионот се совпаѓа со неговиот.
Сите информации поврзани со најновите случувања со војната во Украина можете да ги прочитате ТУКА.