Пратениците на Думата денеска едногласно гласаа за ратификување на Договорот за сеопфатно стратешко партнерство меѓу Русија и Северна Кореја, во време кога Западот тврди дека има докази за испраќање севернокорејски војници во Русија.
Западот гледа ризик од голема ескалација во војната меѓу Русија и Украина, по 32 месеци од почетокот на конфликтот, пишува Франс прес.
Вкупно 397 пратеници на Думата, долниот дом на рускиот парламент, го поддржаа текстот.
Текстот сега треба да го изгласа Советот на Федерацијата, Горниот дом на парламентот, а доколку биде изгласан, треба да го потпише претседателот на Русија, Владимир Путин.
Договорот за сеопфатно стратешко партнерство меѓу Русија и Северна Кореја беше потпишан на 19 јуни за време на посетата на Путин на Пјонгјанг, како одраз на забрзаното приближување меѓу двете земји.
Договорот, меѓу другото, во членот четири, предвидува „непосредна воена помош“ во случај на вооружена агресија од трета земја.
Украинската армија контролира неколку стотини квадратни километри руска територија откако започна ненадејна офанзива на почетокот на август врз руската област Курск.
Во источна Украина руските трупи продолжуваат да напредуваат.
Според текстот на договорот, „ако во една од страните се случи грозен напад од страна на држава или која било група држави и таа се најде во воена состојба, другата страна веднаш ќе обезбеди воена или друга помош со сите средства со кои располага, во согласност со член 51 од Статутот на ОН и руските и севернокорејските закони“.
Северна Кореја негираше дека испратила свои војници во Русија да се борат во офанзива против Украина, а претставникот на Пјонгјанг во ОН рече дека тоа се неосновани гласини.
Русија не потврди дека на нејзина територија има севернокорејски војници.
Кремљ во понеделникот објави дека има намера да продолжи со развојот на соработката со Северна Кореја, што, како што беше речено, не треба никого да загрижува бидејќи не е „насочено против ниту една трета земја“.
Сепак, според Вашингтон, од почетокот на октомври до средината на месецот, Северна Кореја испратила најмалку 3.000 војници на истокот на Русија, со што се потврдуваат информациите што дошле од Јужна Кореја.
Јужнокорејската разузнавачка служба исто така минатата недела соопшти дека Северна Кореја одлучила да испрати до 12.000 војници за да и помогне на Русија.
Гласањето во Думата се одржува на завршниот ден на самитот на БРИКС во Казан, Русија, на кој се собраа девет земји претставени како „глобален југ“ – Кина, Индија, Русија, Јужна Африка, Бразил, Етиопија, Иран, Египет, Обединетите Арапски Емирати.
На бројни средби во рамките на тој самит, рускиот претседател Путин се обиде да демонстрира неуспех на политиката на дипломатска изолација и економски санкции против неговата земја.