Ако го пребарате генералот Олександр Сирски на интернет, тој ќе биде опишан како „најуспешниот генерал на 21 век досега“. Тоа е голема одговорност.
Генералот Сирски ја предводеше одбраната на Киев на почетокот на целосната руска инвазија на Украина минатата година.
Тој беше мозокот зад изненадувачката и успешна контра-офанзива на Украина во Харков минатото лето.
Тој сега ја надгледува обновената офанзива како шеф на воените операции во источна Украина – една од двете главни оски на украинската контраофанзива.
„Сакаме брзи резултати, но во реалноста тоа е невозможно“
Новинарите на Би-Би-Си го сретнаа Сирски на тајна локација до командното возило што го користи за да ги посетува своите војници и да ја следи битката.
На покривот има моќен митралез. Внатре, голем екран прикажува повеќекратни видео доводи во живо од бојното поле од стотици дронови.
Тие гледаат пренос од бомбардираните полиња околу Бахмут, каде што некои од неговите војници се обидуваат да ја вратат територијата.
Новинарот го прашува дали целта му е повторно да го освои градот?
Тој се смее и вели: „Да, се разбира. Се обидувам да го направам тоа“.
Но, дури и тој признава дека, повеќе од еден месец од почетокот, долгоочекуваната офанзива на Украина на неколку фронтови оди побавно отколку што многумина се надеваа.
„Би сакале да постигнеме многу брзи резултати“, вели генералот Сирски. „Но, во реалноста тоа е практично невозможно.“
„Не одиме толку брзо како што би сакале“
Тој вели дека и на исток областа е преплавена со мини и одбранбени бариери. Русите, вели тој, имаат многу упоришта.
„Значи, нашиот напредок навистина не оди толку брзо како што би сакале“, додава.
Но, генералот Сирски верува дека Украина сè уште има една јасна предност.
„Верувам дека единството на нашето воено раководство и довербата на нашите војници е една од силните страни на нашата армија. Ова е во целосна спротивност со руската воена хиерархија, која страда од внатрешни борби и редовно ги отстранува високите офицери од командната линија.“
Украинците тврдат дека Русите наскоро ќе бидат заробени во Бахмут
Генералот Сирски е идол за оние околу него кои ја ценат неговата посветеност, решителност и лукавство.
Се опушта се со одење во теретана секој ден. Тој спие само четири и пол часа навечер.
На југ и север од Бахмут, Украина соопшти дека вратила од Русите територија од речиси 30 квадратни километри.
Заменик-министерката за одбрана на Украина Хана Маљар изјави дека руските сили во градот наскоро ќе бидат заробени.
Но, гранати сè уште паѓаа врз една украинска позиција што ја посетија новинарите, на само 3 километри од градот.
Алек, еден од војниците од 57-та бригада на Украина, ја опишува ситуацијата како „напната“.
Тој покажува на голем кратер создаден од руски артилериски проектил тоа утро. Тој слета на само неколку метри од неговиот ров.
Набргу потоа, новинарите на Би-Би-Си исто така мораа да бараат засолниште.
Ситуацијата во Бахмут се сврте
Настрана од гранатирање, командантите во длабок бункер ги координираат напорите за повторно преземање на Бахмут.
Пред два месеци, кога дописникот на Би-Би-Си последен пат беше таму, Украина губеше територија и беше во опасност да биде опколена. Сега ситуацијата се сврте.
Полковникот Олександр Бакулин, командант на 57-та бригада, вели дека сега Русите се во неволја.
Тој вели дека не го потценува својот непријател, но дека редовните руски трупи со кои сега се соочува не се како платениците на Вагнер на Евгениј Пригожин, кои на крајот го зазедоа градот претходно оваа година.
Вагнер, вели тој, „биле непријатни непријатели (…), тие убивале заради убивање“.
„Ако вложиме малку труд, Бахмут би можел да биде опколен“, вели полковникот Бакулин.
Спротивно на конвенционалната воена мудрост, тој вели дека неговите загуби во офанзивата се помали отколку кога неговата единица била статична, бранејќи го градот.
Тој вели дека напредокот, иако бавен, го подобрил и моралот, па „полесно се поднесуваат загубите“.
За прв пат имаат војници колку и Русите на источниот фронт
За прв пат на источниот фронт, бројот на украинските сили сега се совпаѓа со бројот на руски војници – околу 160.000. Сепак, Русите се уште имаат предност во артилерија.
Дали ситуацијата би можела да се промени со доаѓањето на американските касетни бомби, кои содржат десетици мали бомби кои можат да бидат расфрлани на пошироко подрачје?
Повеќе од сто земји ги забранија.
Полковникот Бакулин вели дека тие се потребни за „да се нанесе максимална штета на непријателската пешадија“.
„Колку повеќе пешаци умираат овде, толку повеќе нивните роднини назад во Русија ќе ја прашуваат нивната влада „зошто“.
Но, тој додава: „Не можам да кажам дека касетните бомби ќе ги решат сите наши проблеми на бојното поле“.
„На нашиот народ му требаат победи“
Тој признава и дека тоа е контроверзно оружје.
„Да не го искористеа Русите, можеби нашата совест немаше да ни дозволи да го направиме тоа“, вели тој
Генералот Сирски потврди дека американските касетни бомби сега пристигнале во Украина и ќе бидат подготвени за употреба за неколку дена.
Новинарите видоа американски хаубици М777 кои ќе испукаат касетни бомби. Тие беа поставени околу Бахмут.
Генералот вели дека повторното заземање на градот би имало повеќе од симболична вредност.
Тој тврди дека Бахмут има и стратешко значење – тој е порта кон другите клучни градови во регионот. Но, тој вели нешто уште поважно:
„Нашиот народ чека на победи, му требаат мали победи“.
Сите информации поврзани со најновите случувања со војната во Украина можете да ги прочитате ТУКА.