Министерството за внатрешни работи во соработка со Републичкиот совет за безбедност во сообраќајот на патиштата и Факултетот за безбедност денеска во Куманово ја реализираа кампањата за побезбеден сообраќај под мотото „И јас и ти, сите сме пешаци“.
Студентите на факултетот за безбедност и припадници на сообраќајната полиција денеска поделија флаери со едукативна содржина како учесниците во сообраќајот да се заштита себе, но и останатите.
Како што изјави деканот на Факултетот за безбедност Никола Дујовски, кампањата има цел особено да допре до младите и да ги заштити.
– Со оваа кампања сакаме особено да им се обратиме на помладите да ги заштитиме и да бидат повнимателни за себе и за другите учесници во сообраќајот. Навистина не се убави сликите што се емитуваат по медиумите кога гледаме дека семејства тажат по своите загинати членови и затоа сите заеднички треба да одговориме на овој предизвикизјави деканот Дујовски.
Според портпаролот на Министерството за внатрешни работи Тони Ангеловски, кампањите даваат резултати, а тоа го покажува и статистиката која вели дека во првите три месеци лани имало 28 жртви во сообраќајот, а оваа година 18.
– Во март имаме четири жртви, споредено со минатата година тоа е четири пати помалку затоа што минатата година имавме 16 жртви во сообраќајот. Но, за нас и една жртва е многу и затоа интензивно продолжуваме и со овие превентивни кампањи, но и со репресивните односно со санкционирање на оние што не ги почитуваат правилата за да имаме што е можно побезбеден сообраќај, изјави Ангеловски.
Според портпаролот на Републичкиот совет за безбедност во сообраќајот на Патиштата Дејан Андоновиќ, пешаците се најмасовни учесници во сообраќајот, но и најнедисциплинирана категорија.
– Пешаците се најмасовна, најранлива, но и најнедисциплинирана категорија на учесници во сообраќајот, сите сме првин пешаци, па потоа се друго и во сообраќајот треба да знаеме дека нема апсолутна предност и оттаму почитувајте ги правилата и прописите, пропишаната сообраќајна сигнализација, преминувајте улица таму каде што е означено, изјави Андоновиќ.
Инаку, како дел од кампањата, СВР Куманово имаше дефиле и со автомобилите и моторите кои ги користи сообраќајната полиција.
Никола Ивановски