Илон Маск ја започнува новата година како најбогатиот човек на светот. Тој е и единствениот милијардер чие богатство надминува 400 милијарди долари.
Маск влегува во оваа година со имот проценет на 421,2 милијарди долари, според магазинот Форбс.
Тоа е 91 милијарда долари повеќе отколку пред еден месец.
Големиот скок во неговото богатство дојде откако SpaceX одлучи да ги откупи сопствените акции, во зделка што ја вреднува компанијата на 350 милијарди долари, објави Блумберг.
Претходно, SpaceX беше проценет на 210 милијарди долари.
Илон Маск го основа SpaceX во 2002 година и ја води компанијата како извршен директор. Таа поседува 42 отсто од акциите.
Новото вреднување го направи SpaceX највредната компанија во светот, која не е котирана, дури и повредна од сопственикот на TikTok, BiteDance.
Маск го води и производителот на автомобили Тесла, има удели во социјалната мрежа X, фирмата за вештачка интелигенција kAI и компанијата за градење тунели Boring Company.
Минатата година Маск ја започна годината со богатство од 251 милијарда долари.
Привлече големо медиумско внимание по изборната победа на Доналд Трамп. Трамп го назначи за еден од раководителите на советодавното тело – Одделот за владина ефикасност.
Ова тело треба да се грижи за намалување на трошоците и зголемување на ефикасноста.
Џеф Безос е вториот најбогат човек во светот.
Само еден месец претходно беше трет. Основачот и претседател на Amazon, кој поседува 9% од акциите, додаде околу 10 милијарди долари на своето богатство минатиот месец, благодарение на приближно 5% пораст на акциите на гигантот за е-трговија.
Новата година ја започнува со богатство од 233,5 милијарди долари.
Основачот на Nvidia е за прв пат на листата
Извршниот директор и ко-основач на Nvidia, Џенсен Хванг, за прв пат се најде на листата на 10-те најбогати луѓе во светот.
Се наоѓа на десеттото место, со проценети 118 милијарди долари.
Најголем дел од неговото богатство доаѓа од уделот во производителот на чипови, чии акции се зголемија за 171 отсто во 2024 година.
Nvidia ја заврши годината со пазарна вредност од 3,28 трилиони долари, што ја прави повредна од Microsoft, но сепак не и од Apple.
Хванг на листата го претекна Амансио Ортега, основачот на трговскиот синџир Зара и компанијата Индитекс.
Заедно, 10-те најбогати луѓе во светот вредат 1,9 трилиони долари (1.900 милијарди).
На првиот ден од декември тие вредеа 1,8 трилиони. Седум од десетте најбогати луѓе сега се побогати отколку пред еден месец.
Најголем губитник
Најголем губитник во оваа група е претседателот на Oracle, Лари Елисон.
Неговото богатство падна за 17,2 милијарди долари во текот на изминатиот месец, на околу 210 милијарди долари.
Со тоа од второто падна на третото место.
Форбс ја прави листата на најбогати од 1987 година.
Во април 2024 година, тие идентификуваа вкупно 2.781 милијардери.