Кадровското екипирање на Општа болница Куманово продолжува со нови 23 вработувања на приватни специјализанти, кои ќе бидат распоредени во 12 медицински специјалности.
Постапката за нивно вработување веќе е започната, информира директорот на болницата, Сашо Стошевски.
Станува збор за втора фаза од проектот за вработување на 600 приватни специјализанти.
Во првата фаза, во кумановската болница беа вработени 27 лекари, а со новите 23, вкупниот број ќе достигне 50.
Најголем број од предвидените вработувања се во областа на неврологијата, за која се планирани шест лекари, потоа интерната медицина со четири и пулмологијата и алергологијата со три специјализанти.
Дополнително, ќе бидат вработени двајца специјализанти по гастроентерохепатологија, како и по еден лекар во областите гинекологија и акушерство, дерматовенерологија, кардиологија, ортопедија, психијатрија, физикална и рехабилитациона медицина, медицинска биохемија и радиодијагностика.
Со оваа фаза, Општа болница Куманово продолжува со проширување на медицинскиот кадар во повеќе специјалности.
Никола Ивановски