Меѓународната агенција за атомска енергија (МААЕ) објави дека е информирана дека рано утрово по локално време, далноводот „Ферославна-1“ што ја поврзува нуклеарната централа Запорожје на југот на Украина, која е под руска контрола, со надворешната мрежа, е исклучен, што предизвика уште еден прекин на надворешното напојување со електрична енергија.
МААЕ објави на платформата X дека, според прелиминарните проценки, штетата на далноводот се наоѓа на северниот брег на реката Днепар.
„Обидот за повторно поврзување на далноводот беше неуспешен, а техничарите во моментов не се во можност да ја утврдат причината за прекинот на електричната енергија поради тековните воени операции. Резервните дизел генератори беа автоматски стартувани за да обезбедат струја за виталните безбедносни системи на централата“, се вели во соопштението.
Се забележува дека тимот на МААЕ сместен во централата продолжува да ја следи и проценува ситуацијата.
„Секое губење на надворешно напојување укажува на исклучително кревка ситуација во однос на нуклеарната безбедност во електраната Запорожје“, изјави генералниот директор на МААЕ, Рафаел Гроси, повторно повикувајќи на максимална воздржаност и заштита на надворешниот систем за напојување на нуклеарната централа, пренесува Танјуг.