Таткото на напаѓачот кој се обиде да го убие Доналд Трамп повикал полиција пред пукањето во саботата бидејќи бил загрижен за својот син.
Како што јави Би-Би-Си, овој повик е еден од низата таканаречени „црвени знамиња“ откриени во последните денови, кои укажуваат на тоа дека органите на редот биле информирани за атентаторот пред да одекнат истрелите во Батлер, Пенсилванија, каде што Трамп имал митинг.
Агенциите за спроведување на законот, особено Тајната служба на САД, се соочуваат со зголемени прашања за пропусти, додека повиците од некои членови на Конгресот за шефот на агенцијата да поднесе оставка се сè погласни.
„Таткото на Томас Метју Крукс повикал полиција бидејќи бил загрижен за својот син и неговото место на живеење“, изјавил за CBS News извор близок до истрагата.
Не е јасно кога бил упатен тој повик, но секако бил пред нападот на Трамп.
Засега не се знае што точно рекол неговиот татко во полиција.
Фокс њуз објави дека родителите на Крукс, Мери и Метју, им кажале на полицајците дека се „загрижени“ за нивниот син и дека тој исчезнал без никакво известување.
ФБИ потврди дека родителите на атентаторот, кој беше ликвидиран, соработуваат со истрагата.
Извори блиски до истрагата изјавија дека пред нападот, атентаторот на интернет барал големо депресивно растројство како и Националната конвенција на Демократската партија, која е закажана за август.
„Вашингтон пост“ претходно објави дека атентаторот ги спасил фотографиите на Трамп, претседателот Џозеф Бајден, јавниот обвинител Мерик Гарланд, директорот на ФБИ Крис Вреј и член на британското кралско семејство.
Властите се уште се обидуваат да го утврдат мотивот на 20-годишникот. Во неговиот напад во саботата, едно лице од публиката беше убиено, додека неколку други беа ранети.
Прелиминарната истрага утврдила дека Крукс се качил на покривот на блиската зграда надвор од релито.
Тој се искачил со помош на клима уредите кои се наоѓаат веднаш до зградата.
Службеник за безбедност задолжен за набљудување и откривање на снајперисти пријавил сомнително лице во Тајната служба 20 минути пред нападот.
Локалната полиција прво го забележала напаѓачот, кој се однесувал чудно и имал ранец, околу еден час пред пукањето.
Го изгубиле во толпата, но снајперистот повторно го забележал.
Полицајците биле известени за сомнително лице преку радио и ја пребарале областа каде Крукс ја ставил својата пушка на покривот.
Не нашле никого, а полицаец решил да го провери покривот.
Еден колега го крена полицаецот на покривот и тој се соочил со осомничениот, потврди за CBS шерифот на округот Батлер.
Осомничениот ја вперил пушката кон него, а полицаецот кој бил во безизлезна положба паднал на земја.
Потоа ги предупредил другите за напаѓачот. Неколку моменти подоцна почнало пукањето.
Инспекторите истражуваат различни теории, вклучително и дека напаѓачот го сокрил оружјето порано во текот на денот во близина на климатизер или дека некако можел да го прошверцува во својот ранец.
Истражувањето на неговите движења во часовите пред нападот ќе биде клучно за да се разбере како се одвивал нападот, велат официјалните лица.
Таткото на Крукс во 2013 година легално ја купил пушката АР 15 со која се пукало на Трамп.
До телото на Крукс бил пронајден далечински детонатор, а во неговиот автомобил бил откриен експлозив.