Дмитриј Медведев, заменик-претседателот на Советот за безбедност на Русија, во вторникот издаде ново нуклеарно предупредување до Украина и Западот, откако Русија почна да ги објавува резултатите од референдумите одржани како дел од подготовките за анексија на четири украински региони.
Нуклеарното предупредување издадено од Медведев, сојузник на рускиот претседател Владимир Путин, е едно од неколкуте издадени од Путин и неговите соработници во последните недели.
Сепак, предупредувањето на Медведев се разликува од претходните по тоа што тој за прв пат предвиде дека НАТО нема да ризикува нуклеарна војна и директно да се вклучи во конфликтот во Украина, дури и ако Москва ја нападне Украина со нуклеарно оружје.
„Верувам дека НАТО нема директно да интервенира во конфликтот, дури и во ова сценарио. Демагозите преку океанот и во Европа нема да загинат во нуклеарна катастрофа“, напиша тој во објавата на Телеграм.
Аналитичарите велат дека предупредувањата имаат за цел да ги одвратат Украина и Западот со сигнализирање на подготвеност за употреба на тактичко нуклеарно оружје за одбрана на припоените територии, додека руските сили со недели се соочуваат со силни украински контранапади.
„Тоа целосно ќе ја промени природата на конфликтот“
НАТО во вторникот соопшти дека руската употреба на нуклеарно оружје е неприфатлива и ќе има тешки последици, откако Медведев упати уште едно нуклеарно предупредување до Украина и Западот поради неговата употреба.
„Секоја употреба на нуклеарно оружје е апсолутно неприфатлива и целосно ќе ја промени природата на конфликтот. „Русија мора да знае дека нуклеарна војна не може да се добие и дека никогаш не треба да се води“, изјави генералниот секретар на Алијансата Јенс Столтенберг.
„Кога гледаме како овој вид нуклеарна реторика излегува од Русија повторно и повторно, од претседателот Путин, тоа е нешто што треба да го сфатиме многу сериозно. Затоа, испраќаме јасна порака дека тоа ќе има сериозни последици за Русија“, рече Столтенберг.
Американскиот весник „Политико“ цитираше неименувани официјални лица кои велат дека Вашингтон и неговите сојузници внимателно ги следат сите индикации за можен руски нуклеарен напад во Украина.
Сите информации поврзани со најновите случувања со војната во Украина можете да ги прочитате ТУКА.