Во Тајван, повеќе од 40.000 домаќинства се уште се без струја поради тајфунот Хаикуи, кој ги погоди источниот и јужниот дел на островот, а училиштата и деловните субјекти беа затворени во погодената област, додека авиокомпаниите ги откажаа летовите.
„Хаикуи“ е првиот тајфун што директно го погоди Тајван во последните четири години.
Без струја во неделата останаа повеќе од 160.000 домаќинства, но во меѓувреме е вратено снабдувањето со илјадници корисници, така што сега повеќе од 40.000 домаќинства немаат струја, објави државната компанија Тајпауер.
Во областите и градовите низ јужниот, источниот и централниот Тајван, наставата беше откажана за денес, а на работниците им беше даден слободен ден, објави Ројтерс.
За денеска се откажани и фериботите до блиските острови.
Над 40 лица се повредени во ударот на тајфунот „Хаикуи“ во Тајван, а повеќе од 7.000 луѓе се евакуирани, објави „Гардијан“.
Во градот Тајтунг силниот ветер корнеше дрвја.
„Хаикуи“ утрово почна да навлегува во Тајванскиот теснец и да се движи кон Кина, објавија тајванските метеоролози.
Кинеските метеоролози утринава издадоа предупредување за тајфун за провинциите Фуџијан и Гуангжу.