Луфтханза предупреди дека ќе ги зголеми цените и ќе го намали бројот на летови за да го надомести очекуваното зголемување од 1,7 милијарди евра на трошоците за авионско гориво предизвикано од затворањето на Ормутскиот теснец.
Најголемата германска авиокомпанија рече дека конфликтите на Блискиот Исток претставуваат „огромни предизвици“ за целата индустрија и предупреди дека евентуалното намалување на достапноста на горивото подоцна во годината ќе претставува дополнителен ризик.
И покрај ова, од компанијата посочуваат дека побарувачката за патувања останува висока и очекува силна летна сезона.
Поради зголемените трошоци, голем број авиокомпании ширум светот – вклучувајќи ги Qantas, Turkish Airlines, Virgin Atlantic и United Airlines – веќе ги зголемија цените или го намалија бројот на летови, или и двете.
Според податоците на аналитичката фирма Цириум, авиокомпаниите отстраниле околу 13.000 летови од своите мајски распореди, односно речиси два милиони седишта, што покажува колкаво е влијанието на кризата врз глобалниот воздушен сообраќај.