Севернокорејскиот лидер Ким Џонг Ун изрази благодарност до војниците распоредени да се борат за Русија во војната против Украина и ги охрабри во текст што се чинеше дека е негова новогодишна порака до војниците, се вели во извештајот на Вашингтон пост.
Американскиот весник вчера објави извештај за рачно напишани пораки испратени од Ким на 31 декември и 1 јануари, што укажува на тоа дека пораките можеби биле испратени до војници од Пјонгјанг или напишани од севернокорејски војници кои ги слушале нивните команданти како гласно ги читале пораките од Ким, објави Јонхап.
Во едно од писмата, со датум 31 декември, рачно напишано со сино мастило и потпишано од Ким, се наведува дека не може да најде зборови за соодветно да ги охрабри и изрази благодарноста за посветеноста и неуморните напори на војниците.
Во извештајот на Вашингтон пост се наведува дека писмото го пронашле украинските специјални сили кај севернокорејски војник во областа Курск во Русија.
„Доживеавте трогателни жртви и радости од скапите борбени победи, многу благородни борбени искуства, бесценето чувство на вистинско другарство и патриотизам, сето тоа далеку од татковината“, се наведува во писмото.
Дополнително, на војниците им се посакува добро здравје додека воената мисија што им е доделена не заврши со победа и се повикуваат да ја удвојат својата храброст во борбата, наведува агенцијата.
Се проценува дека Северна Кореја испратила околу 11.000 војници да ја поддржат Русија во војната против Украина, пренесува Танјуг.