Офанзивата во сириската провинција Алепо, која започна на 27 ноември, ја спроведува коалиција на исламистички милитантни групи предводени од поранешниот огранок на Ал Каеда, Хајат Тахрир ал-Шам, поддржан од Турција.
Според извештаите на некои исламистички страници на социјалните мрежи, бунтовничките групи со седиште во регионот Идлиб, наводно членови на Турската исламска партија (ТИП), поминале оперативна обука под специјалните сили припадници на групата Химик, воената разузнавачка служба на Украина (ХУР).
Тимот за обука се фокусираше на тактиките развиени за време на војната во Украина, вклучително и употребата на дронови, пишува Киев пост.
Групата Химик на ХУР е заслужна за нападот врз руската воена база во југоисточното предградие на Алепо на 15 септември, при што беа уништени руски борбени беспилотни летала и „камуфлирани импровизирани експлозивни направи“, изјави за Киев пост извор од украинската воена разузнавачка служба.
Истиот извор наведува дека припадниците на украинските специјални сили даваат поддршка за актуелните напади на бунтовниците, но оваа информација не е независно потврдена.
Дел од поширокиот тренд на војување против Русите во странство
Информациите за вмешаноста на Украина може да се гледаат како дел од пошироките напори на украинските сили кои ги напаѓаат руските сили во странство, вклучително и наводна директна поддршка за напад на исламистичката милиција врз платеници од руската група Вагнер и владините сили на 26 јули во Мали.
„Ќе продолжиме да ги убиваме Русите насекаде и секаде до целосна победа на Украина“, рече началникот на ХУР, генерал-мајор Кирило Буданов во интервју во мај 2023 година, по извештаите дека украинските сили дејствуваат против руските платеници во странство.
Неколку регионални извори кон средината на минатата недела објавија дека борците на Хајат Тахрир ал Шам нападнале од заседа и убиле група руски специјални сили на периферијата на Алепо во првите денови од офанзивата.
Во следните денови, сириските владини сили беа изненадени од брзината на бунтовничките напади кои стигнаа до центарот на Алепо. Бунтовниците наидоа на слаб отпор бидејќи и сириските и руските сили „тактички се повлекоа како подготовка за контраофанзива“.
Бунтовниците го освоија и аеродромот
Во исто време, беше објавено дека опозициската група Сириски демократски сили (SDF) предводени од Курдите го напаѓаат градот Алепо од исток и дека ја презеле контролата врз меѓународниот аеродром откако режимските сили го напуштиле.
Ројтерс доцна во саботата објави дека Русија се подготвува да пренесе дополнителна воена опрема, вклучително и борбени авиони Су-34, во Сирија во наредните денови, главно од единици од западна Русија кои ги поддржуваат силите кои се борат во Украина.