Новиот министер за одбрана на Јужна Кореја, Ким Џонг-хјун, денеска предупреди дека Северна Кореја ќе доживее колапс на нејзиниот режим доколку продолжи со провокации и најави воспоставување на „супериорна“ одбранбена позиција против заканите на Северна Кореја.
Ким ова го предупреди во својот говор на инаугурацијата, откако претседателот Џун Сук-јол претходно денеска го потврди неговото назначување, пренесува Јонхап.
„Со цел да се осигураме дека непријателот не се осмели да изврши провокација, ќе воспоставиме супериорна одбранбена позиција и способности за да ги одвратиме непријателските провокации“, рече Ким, поранешен шеф на Претседателската служба за безбедност.
Како што предупреди, во случај на провокација, Пјонгјанг ќе плати „страшна цена според принципот на итна казна, строго и до крај“.
„Доколку извршат провокација, ќе се соочат со колапс на нивниот режим“, рече новоименуваниот министер за одбрана на Јужна Кореја.
Во конференцијата со највисоките воени претставници, Ким повика на 24-часовен надзор на севернокорејскиот режим и војската, како и итен одговор доколку е потребно.
Ким претходно, додека сè уште беше кандидат за нов министер за одбрана, изјави дека е отворен за сите опции, вклучително и нуклеарно оружје за Јужна Кореја доколку е потребно за да се елиминираат севернокорејските нуклеарни и ракетни закани.
Оваа година Северна Кореја ги зголеми тензиите меѓу двете земји со испраќање илјадници балони со ѓубре во Јужна Кореја и лансирање на 37 балистички ракети, потсетува јужнокорејската агенција, пренесува Танјуг.