Израелската армија објави дека напредувала во Џабалија, на северот на Појасот Газа и дека извршила рација во седиштето на безбедноста на палестинската милитантна група Хамас во таа област.
Во соопштението на армијата се наведува дека тие дејствуваат подлабоко во Џабалија, откако го опколиле бегалскиот камп, а при рацијата во упориштето на Хамас, која била извршена заедно со Шин Бет, биле пронајдени оружје, опрема и разузнавачки информации, пишува „Тајмс оф Израел“.
Израелската армија соопшти дека нејзините воздушни сили продолжиле со нападите во Појасот Газа, како и дека вчера била нападната група елитни оперативци на Хамас, за време на заедничка операција со Падобранската бригада. Армијата во таа прилика пронашла и залихи на ракети.
Израелската морнарица извршила и десетици напади долж брегот на Газа, помагајќи им на копнените сили, се наведува во соопштението на војската, пренесува Танјуг.